सुन्दरहरैंचाः तीन वर्षमा निर्माण सम्पन्न गर्ने योजनाका साथ पूर्वपश्चिम राजमार्गको काँकरभिट्टा–लौकही सडकखण्ड स्तरोन्नतिका लागि काम शुरु हुने भएको छ ।
एशियाली विकास बैंकले स्तरोन्नति गर्न लागेको यो सडक एशियन हाइवे मापदण्डको बन्ने र जम्मा लागत २८ अर्ब १७ करोड रुपैयाँ रहेको छ ।
हाल काँकरभिट्टाबाट लौकहीसम्मको १२० किलोमिटर सडक स्तरोन्नति हुने भनिए पनि हाल ९७ दशमलव सात सय ७० किलोमिटर सडक मात्र ठेक्का लागेको छ । जसमा सडक किनारमा पर्ने ११ हजार पाँच सय १३ वटा रुख कटान हुने वातावरण प्रभाव मूल्याङ्कन प्रतिवेदनमा उल्लेख छ ।
काँकरभिट्टा––लौकही सडक आयोजना इटहरी कार्यालयका अनुसार सडक क्षेत्रबाट ३५ मिटर क्षेत्रभित्र पर्ने रुखमात्र काटिने र काटिएका रुखको दश गुणा बढी बिरुवा रोपिनेछ ।
डिभिजन वन कार्यालय मोरङका अनुसार मोरङ खण्डको ३६ किलोमिटर क्षेत्रमा ५ हजार ५ सय ५६ वटा रुख पर्छन् । मोरङ खण्डका मङ्गलबारे, पथरी, कानेपोखरी, बेलबारी र सलकपुर सवडिभिजन वन कार्यालयले सडक क्षेत्रमा पर्ने रुखमा छाप लगाउने काम (छपान) गरिरहेका छन् ।
काँकरभिट्टाबाट दमकसम्मको ४५ किलोमिटर सडक दमकस्थित कार्यालयले र दमकबाट इटहरी पश्चिमसम्मको सडक इटहरी कार्यालयले हेर्ने भएको छ । सडक र पुल निर्माणका लागि पाँच वटा अलगअलग ठेक्का लगाएको छ ।
बजार क्षेत्रमा ५० मिटर, जङ्गल क्षेत्रमा २४ मिटर र ग्रामीण क्षेत्रमा ३३ मिटर चौडाइको सडक निर्माण हुने आयोजनाले जनाएको छ । सडक क्षेत्रमा रहेका चार सय चार वटा अस्थायी संरचना हटाउनु पर्नेछ । शहरी क्षेत्रमा साइकल लेन, फुटपाथ, ड्रेनसहित निर्माण हुने यस सडकको एकै पटक काम शुरु हुनेछ ।
