विराटचोकः इन्द्रपुर जुनियर जेसीजको आयोजनामा आज विराटचोकस्थित नेपालीरिका होटलमा ‘अबको सुन्दरहरैंचा’ शीर्षकमा विचार विमर्श कार्यक्रम हुने भएको छ ।
आयोजकका अनुसार नीति तथा राजनीति शीर्षक बहसमा सुन्दरहरैंचाका पूर्व नगरप्रमुख शिवप्रसाद ढकाल, कोशी प्रदेशका पूर्व राज्यमन्त्री राजकुमार ओझा र राष्ट्रिय सभा सदस्य गोपीबहादुर अछामीले बहस गर्नुहुने भएको छ । सो बहसको सहजकर्ता सञ्चारकर्मी विनय बाराकोटी रहनुभएको छ ।
त्यस्तै, डा. दीपक न्यौपानेको सहजीकरणमा हुने शिक्षा तथा स्वास्थ्य शीर्षकको बहसमा पूर्वाञ्चल विश्वविद्यालयका उपकुलपति डा. बिजुकुमार थपलिया, आईएनजी ग्रुप नेपालका अध्यक्ष सुलभ बुढाथोकी, सहप्राध्यापक डा. सूर्यबहादुर पराजुली र सुकुना बहुमुखी क्याम्पसका क्याम्पस प्रमुख अर्जुनराज अधिकारीले विचार, विमर्श र बहस गर्नुहुने भएको छ ।
उद्यम, कृषि र संस्कृति शीर्षकको बहसमा पीएलओ ग्रुपका अध्यक्ष भोलेश्वर दुलाल, एग्रीग्रीन नेपालका कार्यकारी निर्देशक डा. राजेन्द्र उप्रेती, राष्ट्रिय सहकारी बैंक लिमिटेडका प्रमुख कार्यकारी अधिकृत बद्री गुरागाईँ र शिल्पी नाट्य केन्द्रका कला निर्देशक युवराज घिमिरेले विचार विमर्श गर्नुहुने भएको छ । सो कार्यक्रमको सहजकर्तामा निरज न्यौपाने रहनुभएको छ ।
सुशासन र पारदर्शिता शीर्षकको बहसको सहजकर्ताको भूमिकामा सञ्चारकर्मी बाबुराम निरौला रहनुहुने भएको छ । सो बहस कार्यक्रममा महालेखा परीक्षकको कार्यालयका महालेखापरीक्षक तोयम राया, उदयपुर जिल्लाका प्रमुख जिल्ला अधिकारी प्रेमप्रसाद लुइँटेल र सुन्दरहरैंचा नगरपालिकाका प्रमुख प्रशासकीय अधिकृत विनोदकुमार न्यौपानेले विचार, विमर्श र बहस गर्नुहुने भएको छ ।
बिहान साढे १० बजे शुरु हुने कार्यक्रम आमन्त्रित व्यक्तिहरू मात्र प्रत्यक्ष रूपमा सहभागी हुन पाउने आयोजकले जनाएको छ ।
