बेलबारीः मेची बहुउद्देश्यीय सहकारी संस्थाको २९ औं वार्षिकोत्सव तथा ३१ औं साधारणसभाअन्तर्गत बेलबारी सेवा कार्यालयको साधारणसभा सम्पन्न भएको छ ।
साधारणसभामा संस्थाका सञ्चालक समिति अध्यक्ष नारायणप्रसाद भट्टराईले संस्थाले गरेका कामका बारेमा जानकारी दिँदै अध्यक्षको प्रतिवेदन प्रस्तुत गर्नुभएको थियो । बेलबारी सेवा कार्यालयमा हाल ६५० जना शेयर सदस्य रहेका छन् ।
आर्थिक वर्ष २०८१\८२ मा सो सेवा काया सेयर पुँजी ५० लाख ५१ हजार, बचत ४ करोड ६३ लाख, कर्जा लगानी ५ करोड ३२ लाख र वासलात ५ करोड ९४ लाख पुगेको प्रतिवेदनमा उल्लेख गरिएको छ । संस्थाले वित्तीय कारोबारलाई चुस्त बनाउन पल्स प्रणाली अनुसार व्यवस्थापन गर्दै आएको जनाएको छ ।
संस्थाले शेयर सदस्यका छोराछोरीले सहकारी विषयमा विद्यावारिधि गर्न चाहेमा १ लाख रुपैयाँ खर्च उपलब्ध गराउने भएको छ । एसईईमा जिल्ला प्रथम हुनेलाई ५० हजार र ४ जीपीए ल्याउनेलाई उच्च शिक्षाका लागि २५ हजार सहयोग गर्ने निर्णय गरेको जनाइएको छ ।
सञ्चालक समिति अध्यक्ष भट्टराईले धेरै सदस्यलाई सानो सङ्ख्यामा लगानी गरेर उद्यमशील बनाउन तालिम, अध्ययन अवलोकन तथा उत्पादनको बजारीकरणमा सहयोग गर्ने योजनाबारे जानकारी दिनुभयो । उहाँले सदस्यलाई १० लाखसम्म उद्यमशील कर्जा नौ प्रतिशत ब्याजदरमा उपलब्ध गराइने र आगामी तीन वर्षसम्म ब्याजदर नबढाइने प्रतिबद्धता व्यक्त गर्नुभयो ।
मोरङ सहकारी संस्था लिमिटेडका सचिव राकेश दाहालले शुभकामना व्यक्त गर्दै सहकारीसँग बाझिने कानुन संशोधन गर्नुपर्ने आवश्यकता औंल्याउनुभयो ।
कार्यक्रममा उत्कृष्ट कारोबार गर्ने सदस्य दिनेश राई, रामबहादुर बस्नेत, क्यारोलिना पन्त, मनिसा पाण्डे र कुमार श्रेष्ठलाई सम्मान गरिएको थियो । शेयर सदस्य टीकाराम खत्रीका छोरा नोयन खत्रीलाई पनि सम्मान गरिएको थियो ।
साधारणसभामा सामान्य सुझाव दिने सदस्यलाई १०० रुपैयाँ र उत्कृष्ट सुझाव दिने ४० जना सदस्यलाई १,००० रुपैयाँसम्म प्रोत्साहनबापत प्रदान गरिने संस्थाले जनाएको छ । साधारणसभा बेलबारी सेवा कार्यालय प्रमुख रमेश क्षेत्रीले सञ्चालन गर्नुभएको थियो ।
कार्यक्रम बेलबारी सेवा कार्यालय व्यवस्थापन उपसमितिकी संयोजक सीता सुवेदीको अध्यक्षतामा भएको थियो ।
