विराटचोकः आर्थिक वर्षको पहिलो दिन बिहीबार नेपाली शेयर बजार सूचक मापक नेप्से परिसूचक ७५ दशमलव ८४ अङ्क अर्थात् २ दशमलव ७१ प्रतिशतले बढेर २८७० दशमलव ६३ विन्दुमा पुगेको छ ।
१३ वटै उपसमूहको परिसूचक बढेको दिन बिहीबार सबैभन्दा धेरै अन्य उपसमूहको परिसूचक ५ दशमलव ०९ प्रतिशत बढेको छ ।
बिहीबार ३११ कम्पनीको ३ करोड ८६ लाख ३४ हजार ३५० कित्ता शेयर १ लाख ४१ हजार ४३४ पटक किनबेच हुँदा १६ अर्ब ५९ करोड २१ लाख ५ हजार ४५५ रुपैयाँको शेयर कारोबार भएको छ । कारोबार रकम गत भदौ ११ गतेभन्दा पछिको धेरै हो । सो दिन साढे १८ अर्बभन्दा बढीको शेयर कारोबार भएपछि यति धेरै रकमको कारोबार भएको थिएन ।
बजार बढेसँगै ट्रेड टावर, शुभम् पावर र थ्री स्टार हाइड्रोपावरको शेयरमूल्य १० प्रतिशत बढेको छ । ट्रेड टावरको आइपीओ सूचीकृतपछि बिहीबार पहिलो दिन कारोबार भएको हो । बिहीबार ९ वटा कम्पनीको मात्रै शेयरमूल्य घटेको छ । सबैभन्दा धेरै माइखोला हाइड्रोपावरको शेयरमूल्य ३ दशमलव ७६ प्रतिशत घटेको छ ।
कारोबार रकमका आधारमा बिहीबार नेपाल पुनर्बीमा कम्पनी शीर्ष स्थानमा रहेको छ । सो कम्पनीको बिहीबार ८४ करोड ४२ लाख ७३ हजार ६४८ रुपैयाँको शेयर किनबेच भएको छ । बुटवल पावर कम्पनी, राधी विद्युत कम्पनी, सानिमा माइ हाइड्रोपावर र ङादी ग्रुप उच्च कारोबार गर्ने कम्पनीमा परेका छन् ।
बजार बढेसँगै समग्र बजार पूँजीकरण ४७ खर्ब ८३ अर्ब ३७ करोड ६० लाख १० हजार ८५ रुपैयाँ कायम भएको छ ।
