विराटचोकः कृषिकर्म गर्नै बुबा मनिलाल चौधरीले शिक्षाको महत्व बुझ्नुभएको थियो । उहाँले छोरा र छोरीमा विभेद नगरी शिक्षादीक्षाको प्रबन्ध मिलाएपछि आफू यो अवस्थामा आइपुगेकोमा विश्वस्त हुनुहुन्छ सुन्दरहरैंचा–४ निवासी मीना चौधरी ।
२०४६ साल बैशाख १ गतेदेखि सुन्दरहरैंचा– ४ मा रहेको आदर्श आधारभूत विद्यालयमा प्रधानाध्यापकको रूपमा कार्यरत चौधरीले २०८१ मंसिर २४ गतेदेखि अवकाश लिनुभएको छ । १६ वर्षमा विवाह गर्नुभएकी उहाँ २२ वर्षको उमेरमा प्रधानाध्यापक हुनुभएको थियो । सो विद्यालयमा प्रधानाध्यापकको जिम्मेवारी सम्हाल्नुअघि उहाँले साजीलाल माविमा २ वर्ष निजी स्रोतमा शिक्षण गर्नुभएको थियो । मासिक ९ सय रुपैयाँ तलब पाउने गरी उहाँले नियुक्ति लिनुभएको थियो ।
सो विद्यालयमा स्थापनाकालमा ४०÷४५ जना विद्यार्थी रहेका थिए । २०५० सालपछि एउटै कक्षामा १ सय जनाभन्दा बढी विद्यार्थी भर्ना हुन्थे । अहिले भने विद्यार्थी सङ्ख्या निरन्तर घट्दो क्रममा छ । सीमान्तकृत समुदायका विद्यार्थी पढ्ने विद्यालय भएको र अभिभावकको कमजोर आर्थिक अवस्थाका कारण विद्यार्थीले पनि अभिभावकलाई काम सघाउने हुनाले विद्यार्थी सङ्ख्या कम रहेको हुन सक्ने उहाँको अनुमान छ ।
विद्यालय स्थापना हुँदा आफूमात्रै शिक्षकको रूपमा रहेकी हुनाले शैक्षिक तथा प्रशासनिक दुवै काम गर्नुपर्दा अप्ठ्यारो अवस्था आएको उहाँ स्मरण गर्नुहुन्छ । अर्काे वर्षदेखि तत्कालीन दुलारी गाविसले निजी स्रोतमा १ जना शिक्षक मासिक २ सय रुपैयाँ तलब पाउने गरी नियुक्त गरेको थियो । ‘४÷५ कक्षामा पढ्ने विद्यार्थीलाई अभिभावकले नै विद्यालय नपठाई आफूसँगै मजुदरीको लागि लैजाने क्रम अहिलेसम्म पनि रोक्न नसकेकोमा उहाँलाई चिन्ता पनि लाग्छ ।
उहाँले विद्यालय स्थापना गर्न धेरै सङ्घर्ष गर्नुपरेको थियो । गाउँलेसँग, बाँस, पराल, काठपात मागेर आफैँ ओसार्नु पनि हुन्थ्यो । विद्यालय स्थापनाा तत्कालीन दुलारी गाविसका उपाध्यक्ष नन्दकुमार चौधरीको पनि ठूलो सहयोग रहेको उहाँ बताउनुहुन्छ । आफ्ना विद्यार्थीमध्ये सञ्जय साहले स्नातकोत्तर तहमा गोल्ड मेडल पाएको क्षण सम्झँदा ज्यादै खुशी लाग्ने उहाँ बताउनुहुन्छ । आफ्ना विद्यार्थी शङ्कर साहु, चन्द्रबहादुर दाहाललगायतका विद्यार्थी सरकारी सेवामा कार्यरत हुनुहुन्छ ।
सम्बन्धित समाचारहरू
हौसला र प्रेरणाको साथमा अघि बढेकी नीलम ढुङ्गाना (नारी दिवस विशेष ४)
समाजसेवा, शिक्षण र सहकारी व्यवस्थापन सँगसँगै गर्ने योजना शर्मा (नारी दिवस विशेष ३)
