विराटचोकः चालु आर्थिक वर्षको पहिलो त्रैमासको अपरिष्कृत वित्तीय विवरणअनुसार वाणिज्य बैंकहरुको खुद नाफा गत आर्थिक वर्षको सोही अवधिको तुलनामा २१ दशमलव ६३ प्रतिशतले बढेको छ ।
२० वाणिज्य बैंकहरुले चालु आर्थिक वर्षको असोज मसान्तसम्ममा १६ अर्ब २३ करोड १९ लाख रुपैयाँ खुद नाफा कमाएका छन् । गत आर्थिक वर्षको सोही अवधिसम्ममा यी बैंकहरुले १३ अर्ब ३४ करोड ४८ लाख रुपैयाँ खुद नाफा कमाएका थिए । केही बैंकहरुले खुद नाफा उच्च दरमा बढाएका छन् भने केही बैंकहरुको नाफामा गिरावट आएको छ ।
नबिल बैंकले सबैभन्दा धेरै २ अर्ब ५ करोड रुपैयाँ खुद नाफा कमाएको छ । यो गत आर्थिक वर्षको सोही अवधिको तुलनामा ३९ दशमलव ९७ प्रतिशत बढी हो । गत आर्थिक वर्षको सोही अवधिमा बैंकले १ अर्ब ४६ करोड रुपैयाँ खुद नाफा कमाएको थियो । ग्लोबल आइएमई बैंक, नेपाल इन्भेष्टमेन्ट मेगा बैंक, प्राइम कमर्सियल बैंक, एनएमबि बैंक, एभरेष्ट बैंक, कुमारी बैंक र प्रभु बैंकले १ अर्बभन्दा बढी नाफा कमाएका छन् ।
सबैभन्दा कम नाफा भने एनआईसी एशिया बैंकको रहेको छ । बैंकले ११ करोड ५ लाख रुपैयाँ मात्र नाफा कमाएको छ । गत आर्थिक वर्षको सो अवधिमा बैंकले १ अर्ब १ करोड रुपैयाँ खुद नाफा कमाएको थियो । समीक्षा अवधिमा बैंकको यस्तो नाफा ८९ दशमलव ०६ प्रतिशत घटेको हो ।
सिद्धार्थ बैंकको नाफा वृद्धिदर सबैभन्दा बढी ७९१ दशमलव ४३ प्रतिशत रहेको छ । गत आर्थिक वर्षको पहिलो त्रैमाससम्ममा ४ करोड २८ लाख रुपैयाँ मात्र खुद नाफा कमाएको यस बैंकले, चालु आर्थिक वर्षको सोही अवधिसम्ममा ३८ करोड २० लाख रुपैयाँ खुद नाफा कमाएको छ ।
७ वाणिज्य बैंकहरुको खुद नाफा भने घटेको छ । नेपाल इन्भेष्टमेन्ट मेगा बैंक, माछापुच्छ्रे बैंक, सिटिजन्स बैंक, सानिमा बैंक, हिमालयन बैक, राष्ट्रिय वाणिज्य बैंक र एनआईसी एशिया बैंकको खुद नाफा समीक्षा अवधिमा घटेको हो ।
