सुन्दरपुरः सुन्दरहरैंचा नगरपालिकाको वडा नम्बर ५ र ६ का बासिन्दालाई स्वच्छ पानी उपलब्ध गराउने गरी सञ्चालित सुन्दरपुर खानेपानी तथा सरसफाइ उपभोक्ता संस्थाको प्रथम साधारण सभा बिहीबार सम्पन्न भएको छ ।
संस्थाका अध्यक्ष नागेश पोखरेलको अध्यक्षतामा भएको साधारणसभाले संस्था स्थापनादेखि हालसम्मको प्रगति प्रतिवेदन तथा आर्थिक प्रतिवेदन पारित गरेको थियो । संस्था २०६८ साल चैतमा स्थापना भए पनि २०७७ साल कात्तिक २ गते कार्यसमिति चयन भएको प्रतिवेदनमा उल्लेख छ ।
संस्थाले खानेपानी आयोजना सञ्चालन गर्नका लागि सुन्दरहरैंचा ५ मा रहेको ज्योति माविले १० कठ्ठा जग्गा भाडामा लिएर संरचना निर्माण गरिएको प्रतिवेदनमा उल्लेख छ । सोही जग्गामा २ लाख २५ हजार लिटर क्षमताको ट्याङ्की निर्माण गरी खानेपानी आपूर्ति गरिएको जनाइएको छ ।
साधारणसभाले वार्षिक प्रगति प्रतिवेदन, आर्थिक प्रतिवेदन, निर्वाचन कार्यविधिलगायतका विषयमाथि छलफल गरी पारित गरेको थियो ।
संस्थाको नयाँ सञ्चालक समिति चयनका लागि असोज १५ गते निर्वाचन हुने भएको छ ।
संस्थाको कार्यक्षेत्र सुन्दरहरैंचा नगरपालिकाको वडा नम्बर ५ र ६ रहेको छ ।
