खेमचन्द्र अधिकारी
विराटचोकः केही वर्ष पहिले सामुदायिक वन क्षेत्रमा पर्यापर्यटनको सम्भावना खोज्ने क्रममा सुन्दरहरैंचाको वडा नम्बर ५ को हसिना सिमसारदेखि वडा नम्बर १० को बाघझोडा सिमसारसम्म साइक्लिङ रुट बनाउने विषयले चर्चा पायो । तर केही समयमै चर्चा सेलायो ।
सुकुना सामुदायिक वनदेखि नमुना सामुदायिक वन क्षेत्रभित्र रहेका बाघझोडादेखि हसिना सिमसारसम्म आन्तरिक पर्यटन बढाउन साइक्लिङ मार्ग बनाउने चर्चा चले पनि त्यत्तिकै सेलाएको हो । सुन्दरहरैंचा साइकल राइडर्स समूहले यसको अगुवाइ गर्ने चर्चा शुरु हु्नासाथ अन्त्य पनि भयो ।
नेपाल सरकारको वन तथा वातावरण मन्त्रालयअन्तर्गतको वन भू संरक्षण विभागले सामुदायिक वनमा पर्यापर्यटन प्रबद्र्धन कार्यविधि २०७५ जारी गरेर पर्यटनसँग जोडिएका सम्भावनालाई प्रबद्र्धन गरी अधिकतम आर्थिक लाभ लिने उल्लेख गरेको छ । जसका लागि वातावरण र जैविक विविधता संरक्षण गरी जलविहार, उद्यान÷पार्क, वन विहार अवलोकन, फोटो यात्रा, भिडियो छायाङ्कन जस्ता क्रियाकलाप सञ्चालन गर्ने नीति सरकारले लिएको छ । यसका लागि स्थानीय सरकारसँगको सहकार्यमा विकास गर्न सकिने कार्यविधिमा उल्लेख गरिएको छ । सोही कार्यविधिभि रहेर नगरको पर्यटकीय विकास गर्न सक्ने देखिन्छ ।
प्रस्तावित सो मार्गमा रहेका वन्यजन्तु, पोखरी, ताल, खोला, खोल्सा, झाडी विभिन्न जातजातिका मठमन्दिर, गुम्बा, विश्वविद्यालयका साथै बस्तीहरु अवलोकन गर्न सकिने हुनाले सो मार्गमा साइक्लिङ गर्न उपयुक्त हुने देखिन्छ । यसका लागि आकर्षक काठबाट निर्मित साँघुरा बाटा, खोल्सीमा बाँस वा काठबाट निर्मित आकर्षक फड्के, घुम्ती बाटाहरु, उकाली, ओराली, माटोका ढिस्का, निर्माण गर्नुपर्ने हुन्छ । जसका लागि ठूलो रकम पनि चाहिँदैन ।
