विराटचोकः नेपालमा मनसुन थप सक्रिय भएपछि ५६ जिल्लामा जल तथा मौसम विज्ञान विभागको मौसम पूर्वानुमान महाशाखाले ‘रेड अलर्ट’ जारी गरेको छ ।
महाशाखाले यसअघि असोज ७ गते जारी गरेको विशेष बुलेटिनमा २७ जिल्लालाई मात्र उच्च जोखिमको सूचीमा राखेको थियो । महाशाखाका अनुसार १९ जिल्ला मध्यम जोखिममा छन् भने मुगु र हुम्ला न्यून जोखिममा छन् ।
बंगालको खाडीबाट प्रवाह हुने जलवाष्पयुक्त वायु तथा त्यस क्षेत्रमा बनेको न्यूनचापीय प्रणालीको प्रभावका कारण नेपालमा ठूलो पानी पर्ने अनुमान गरिएको हो । आज दिउँसोदेखि असोज १३ गते आइतबारसम्म देशभर वर्षाको सम्भावना रहेको महाशाखाले जनाएको छ ।
वर्षाको कारण भूक्षय, बाढी, पहिरो तथा गेग्रान बहावको समेत जोखिम छ । शहरी तथा तराई क्षेत्रहरूमा डुबान हुन सक्ने सम्भावना छ । ठूला तथा साना नदीनाला र खोलाहरूमा पानीको सतह बढ्ने, दैनिक जनजीवन, कृषि, स्वास्थ्य, पर्यटन, सडक तथा हवाई यातायात समेत प्रभावित हुन सक्ने आशंका छ ।
