विराटचोकः सुन्दरहरैंचा नगरपालिकामा क्रियाशील सामाजिक संघसंस्थालाई एक भएर सामाजिक काममा लैजाने उद्देश्यले उद्योग वाणिज्य संघ सुन्दरहरैंचाले पहल शुरु गरेको छ ।
हालै नेतृत्व सम्हाल्न पुगेका नगरका लायन्स क्लब र किवानिस क्लबका अध्यक्षलाई शुभकामना दिन कार्यक्रम आयोजना गरी संघले नयाँ कामको थालनी गरेको हो । कार्यक्रममा ती संस्थाका नेतृत्वकर्ता तथा पदाधिकारीका साथै नगरमा क्रियाशील अन्य सामाजिक संस्था र सरोकारवाला सहभागी थिए । कार्यक्रमको सबैले प्रशंसा गरेका थिए ।
सबै सामाजिक संस्थाले एक भएर समाजसेवा गर्दा मितव्ययिताको पालना हुनुका साथै अन्य धेरै काम गर्न सहज हुने भएकाले कार्यक्रम शुरु गरिएको सुन्दरहरैंचा उद्योग वाणिज्य संघका अध्यक्ष नारायण कार्कीले बताउनुभयो ।
कार्यक्रममा लायन्स क्लब अफ बलिया, बाँसबारी, सुन्दरदुलारी, इन्द्रपुर, विराटचोक सिटी र खोर्साने तथा किवानिस क्लब अफ सुन्दरहरैंचाका नवनिर्वाचित पदाधिकारीलाई सम्मान गरिएको थियो ।
