काठमाडौंः काठमाडौं महानगरपालिकाकी उपप्रमुख सुनिता डंगोलले आफ्नो नाम जोडेर खोलिएका अनधिकृत फेसबुक पेज हटाउन साइबर ब्युरोलाई पुनः आग्रह गर्नुभएको छ ।
बुधबार उपप्रमुख डंगोलको सचिवालय प्रमुख सौरभ गौतमले एक पत्र लेख्दै अनधिकृत पेजमा राखिएका फोटो तथा समाचारहरू हटाइदिन र सामाजिक सञ्जालमा त्यस्ता फोटो र भिडियो र समाचारहरू राख्नेलाई कानुनबमोजिम कारवाही गर्न आग्रह गर्नुभएको छ ।
कृत्रिम बौद्धिकता (एआई) प्रविधिबाट तस्बिर बङ्ग्याएर सामाजिक सञ्जालमा भाइरल बनाइएको विषयमा सचिवालयले साइबर ब्युरोमा पत्राचार गरेको हो ।
यसअघि जेठ १३ गते र असार २५ गते पनि त्यस्तो अनुरोध गरिएकोमा अझै पनि ती पेज बन्द नभएको उपप्रमुख डंगोलको सचिवालयले जनाएको छ ।
पत्रमा लेखिएको छ,‘फेसबुक पेजहरूमा एआई प्रविधिबाट फोटो तथा भिडियो एनिमेशन गरी सामाजिक सञ्जालहरुमा हाली व्यक्तिको चरित्रहत्या गर्नेसम्मका कार्य भइरहेकाले यथासम्भव चाँडो अनुसन्धान गरी उक्त भिडियो, फोटो तथा समाचारहरु हाटाइदिनुहुन र प्रयोगकर्तालाई कानूनबमोजिम कारबाही गरी सहयोग गरिदिनुहुन पुनः अनुरोध गर्दछु ।’
