विराटचोकः गत आर्थिक वर्षमा प्राइम कमर्सियल बैंकले नाफामा उल्लेख्य सुधार गरेसँगै प्रतिशेयर आम्दानी पनि झण्डै ३ गुणा बढेको छ । गत आर्थिक वर्षमा बैंकको प्रति शेयर आम्दानी १४ रुपैयाँ १५ पैसा बढेर १९ रुपैयाँ ४५ पैसा पुगेको छ ।
गत आर्थिक वर्षमा बैंकले ३ अर्ब ७७ करोड रुपैयाँ खुद नाफा कमाएको छ । यो अघिल्लो आर्थिक वर्षको सोही अवधिको तुलनामा २६७ दशमलव १९ प्रतिशत बढी हो । अघिल्लो आर्थिक वर्षमा बैंकले १ अर्ब २ करोड रुपैयाँ खुद नाफा कमाएको थियो । इम्पेरमेन्ट चार्ज घटेका कारण बैंकको खुद नाफा उल्लेख्य बढेको देखिन्छ ।
बैंकको खुद ब्याज आम्दानी १२.१६ प्रतिशत बढेको छ भने खुद फि तथा कमिशन आम्दानी ३१.४५ प्रतिशत बढेको छ । त्यस्तै, बैंकको कुल सञ्चालन आम्दानी १५.५३ प्रतिशत र सञ्चालन मुनाफा १७७.३१ प्रतिशत बढेको छ ।
बैंकको प्रतिशेयर नेटवर्थ १५९ रुपैयाँ ४१ पैसा र मूल्य आम्दानी अनुपात ११.४० गुणा रहेको छ । १९ अर्ब ४० करोड रुपैयाँ चुक्ता पूँजी रहेको बैंकको जगेडा कोषमा ११ अर्ब ५२ करोड रुपैयाँ सञ्चित छ ।
