विराटनगरः होचो घरलाई लिफ्टिङ विधि प्रयोग गरी अग्लो बनाउने काम नेपालमा पनि शुरु भएको छ । हालै विराटनगर बसपार्कका दीनबन्धु गोयलको घर ४ फिट अग्ल्याइएको छ ।
लिफ्टिङ प्रविधि प्रयोग गरेर सो घर अग्ल्याउनुका साथै गोयलकै अर्काे एउटा घर पहिलेको ठाउँबाट सारिएको पनि छ ।
यसअघि विराटनगरका उद्योगी राजेन्द्र राउतको घर पनि लिफ्टिङ प्रविधि प्रयोग गरेर ५५ फिट टाढा स्थानान्तरण गरिएको थियो । उद्योगी राकेश सुरानाको पनि सुनसरीको दुहबीमा एक तले भवन साढे चार फिट अग्ल्याइएको थियो ।
यो प्रविधिमा पुरानो जग र पिल्लर काटेर नयाँ जग बनाएर त्यसमाथि भवन सारिन्छ । अग्ल्याउँदा पनि गाडी उठाउने जगको सहयोगमा घर अग्ल्याई तल गारो लगाउने काम हुन्छ । झण्डै २ महिना लाग्ने सो कामको लागि घर निर्माण गर्दाको १० प्रतिशत जति रकम लाग्ने गरेको बताइन्छ ।
यी सबै घर उचाल्ने र सार्ने कामका लागि भारतीय प्राविधिकसहितको टोली खटिएको थियो ।
