विराटचोकः शुक्रबार नेपाल राष्ट्र बैंकले चालु आर्थिक वर्षको मौद्रिक नीति सार्वजनिक गरेको छ । नीतिले ब्याजदर थप घटाउने र कर्जा प्रवाह बढाउने देखिएको छ । नीतिगत दर र बैंक दर थप घट्ने भएको छ ।
शेयर बजारमा पनि संस्थागत लगानीकर्तालाई लगाइएको २० करोडको सीमा हटाइएको छ । शेयर बजारमै लगानी गर्न भनेर स्थापना भएका संस्थागत लगानीकर्तालाई कर्जा सीमा तोकिनु कुनै पनि हालतमा नभएको लगानीकर्ताको भनाइ थियो । यसमा सम्बोधन भएको छ । व्यक्तिगत लगानीकर्ताले १५ करोडसम्म लगानी गर्न पाउने व्यवस्थामा भने परिवर्तन भएको छैन ।
निर्माण उद्योगलाई विभिन्न छुट, सुविधा र सहुलियत पनि दिइएको छ । निर्माणमा रहेको शिथिलता हटाएर विकास निर्माणका कामलाई द्रुत गतिमा अघि बढाउन यसले सहयोग पुग्ने देखिएको छ ।
उता, बैंक तथा वित्तीय संस्थाहरुमा तरलता थुप्रिएको, ब्याजदर सस्तो भएको अवस्थमा कर्जा विस्तार गर्ने नीति आएको छ । बैंकहरुको लगानी विस्तारमा यसले जोड दिएको छ । यसैगरी, लघुवित्त तथा सहकारी क्षेत्रका समस्या समाधान गर्नेतर्फ पनि नीति केन्द्रित देखिएको छ ।
