विराटचोकः कर्जा सूचना केन्द्रका अनुसार आर्थिक वर्ष २०८०–८१ मा ५२ हजार ३०३ जना व्यक्ति तथा संस्था कालो सूचीमा परेका छन् । तीमध्ये १४ हजार ४२४ व्यक्ति तथा संस्थाहरु उक्त सूचीबाट हटेको पनि कर्जा सूचना केन्द्रले जनाएको छ ।
केन्द्रका अनुसार कर्जा तिर्न नसकेका कारण गत वर्ष १० हजार ९८ जना व्यक्ति कालो सूचीमा परेका छन् । सोही कारण १८२ निर्माण व्यावसायी पनि कालो सूचीमा परेका छन् ।
‘कर्जा डिफल्ट’ र चेक बाउन्सका घटना बढ्दै जाँदा कालोसूचीमा पर्नेको सङ्ख्या पनि उच्च दरले वृद्धि भएको हो । बैंक तथा वित्तीय संस्थाको कर्जा भुक्तानी नगर्नेका साथै पछिल्लो समय चेक बाउन्सको केसमा पनि ग्राहकहरुलाई कालो सूचीमा राखिँदै आएको छ ।
गत वर्ष १७८ सहकारी तथा संस्थाहरु चेक बाउन्सका कारण कालो सूचीमा परेका छन् ।
२०४६ साल पुसदेखि हालसम्म कालो सूचीमा पर्नेको संख्या ९४ हजार ४ सय ७७ पुगेको केन्द्रले जनाएको छ । गत वर्षसम्म २१ हजार ६८४ व्यक्ति तथा संस्था उक्त सूचीबाट हटेको पनि कर्जा सूचना केन्द्रले जनाएको छ ।
