विराटचोकः सामाजिक सञ्जालमा आफ्नो विद्यालयको नामको बारेमा गलत अर्थ लगाई भ्रामक सन्देश दिएपछि साउन ७ गते रुपन्देहीको गजेडी माविले एक विज्ञप्ति निकाल्दै अब भ्रामक सन्देश पोष्ट गरिएमा साइबर अपराधअन्तर्गत उजुरी गरिने जनाएको छ ।
जिल्लाकै उत्कृष्ट विद्यालयको रुपमा रहेको सो विद्यालयको नामसँग जोडेर केही दिनदेखि भ्रामक सन्देश प्रवाह भइरहेका थिए । विद्यालयको नामको अर्थसहित निमित्त प्रधानाध्यापकको हस्ताक्षरमा जारी विज्ञप्ति यस्तो रहेको छः
प्रेस विज्ञप्ति
नेपाली शब्दकोशका अनुसार ’गज’ को अर्थ ’हात्ती’ भन्ने हुन्छ । यसरी ’गज’ आधार पदमा ’डी’ जोडिएर गजेडी शब्दको व्युत्पादन भएको मानिन्छ । स्थानीय थारु भाषामा ’गजेडी’ को शाब्दिक अर्थ ’हात्तीको वासस्थान’ भन्ने बुझिन्छ । यहाँका शिक्षाप्रेमी र बुद्धिजीवीका अनुसार साविक गजेडी गाउँबाट गजेडी स्कूलको नामाकरण भई सोहीअनुसार गजेडी गाउँपञ्चायत र बहुदलपछि गजेडी गा. वि. स. रहन गएको हो । यी र यस्ता वास्तविक र ऐतिहासिक तथ्यहरूलाई नबुझी आफ्नो अयोग्यतालाई प्रदर्शन गर्दै यस विद्यालयको नाममा आधारित भई सामाजिक सञ्जालमा विभिन्न व्यक्ति र फेसबुक पेजहरूले भ्रामक, कपोकल्पित तथा अनर्गल प्रचार गरी विद्यालयको ऐतिहासिक छविमा प्रहार अनि बदनाम गर्न खोजिएको विषयप्रति सिङ्गो विद्यालय परिवार घोर भर्त्सना गर्दछ । आज उपरान्त कहीं कतैबाट कोही कसैले यस प्रकारका आपत्तिजनक क्रियाकलाप गरेमा विद्यालय प्रशासन साइबर कानुन अनुसार कारवाही गर्नका लागि सम्बन्धित निकायमा जाने निर्णय गरेको समेत सम्बन्धित सबैमा जानकारी गराइन्छ ।
