विराटचोकः आज नेप्से परिसूचक ५४.०४ अंक बढेर २३६४.६३ अङ्कमा अडिँदा कारोबार रकम पनि ह्वात्तै बढेको छ । हिजो ९ अर्ब रुपैयाँको शेयर कारोबार भएको बजारमा आज १२ अर्बको कारोबार भएको छ । आज ३०६ कम्पनीको १ लाख ४९ हजार ६८१ पटक शेयर कारोबार भएको थियो । ३ करोड २० लाख ९५ हजार ९३७ कित्ता शेयर किनबेच हुँदा १२ अर्ब ५ करोड ९२ लाख ६६ हजार ११३ रुपैयाँको शेयर किनबेच भएको हो ।
२०७८ भदौ १५ गते १३ अर्ब १६ करोडको कारोबार भएयता सो रकम बराबरको कारोबार हुन सकेको थिएन ।
बढेको बजारमा सबै समूहमा हरियाली छाए पनि ३२ कम्पनीको शेयर भाउ घटेको छ । केही सामुहिक लगानी कोष र डिबेन्चरको शेयरमूल्य ६ प्रतिशतदेखि १० प्रतिशतसम्म घटेको छ ।
आज सेन्ट्रल फाइनान्ससहित सिंगटी हाइड्रो इनर्जी, आँखुखोला जलविद्युत कम्पनी, मन्दाकिनी हाइड्रोपावरको शेयरमूल्य १० प्रतिशतले बढेको छ । सिटिजन्स म्युचुअल फण्ड २ को इकाईमूल्य ९.९० प्रतिशत घटेको छ ।
१० प्रतिशत मूल्य बढेको सिंगटी हाइड्रोको सबैभन्दा धेरै कारोबार भएको छ । सो कम्पनीको २३ करोड ५५ लाख ८१ हजार ६३७ रुपैयाँको शेयर कारोबार भएको छ । एनआरएन इन्फ्रास्ट्रक्चर एण्ड डेभलपमेन्ट बैंक, सोनापुर मिनरल्स एण्ड आयल र हिमाल दोलखा हाइड्रोपावर र अरुण भ्याली हाइड्रोपावर उच्च मूल्य बढ्ने ५ कम्पनीमा परेका छन् ।
आज व्यापार उपसमूहको परिसूचक सर्वाधिक ७ दशमलव ३० प्रतिशत बढेको छ ।
बजार बढेसँगै समग्र बजार पूँजीकरण ३७ खर्ब ५१ अर्ब ९८ करोड ८२ लाख ४९६ रुपैयाँ कायम भएको छ ।
