विराटचोकः शेयर लगानीकर्ताले रुचाएका नेकपा एमालेका विष्णु पौडेल अर्थमन्त्रीमा नियुक्त भएर शपथ लिएको दिन नेप्से दोहोरो अंकले घटेको छ ।
पौडेल आठ पटक मन्त्री हुँदा पाँचौँ पटक अर्थमन्त्री भएका हुन् । उनी अर्थमन्त्री हुने हल्लासँगै अघिल्लो सातादेखि बढेको बजारले आज आराम लिएको अनुमान लगानीकर्ताको छ । आज शेयर बजार १७.१८ अंकले घटेर २२४०.४१ अंकमा बन्द भएको छ ।
आज कारोबार रकम भने बढेको छ । आज ८ अर्ब ७३ करोड १४ लाख ३६ हजार ३७ रुपैयाँको शेयर किनबेच भएको छ । आज ३२२ कम्पनीको २ करोड ५० लाख ७९ हजार ७९ कित्ता शेयर किनबेच हुँदा माथिल्लो तामाकोशीको शेयर सबैभन्दा धेरै ३७ करोड ८ लाख ७२ हजार ५८९ रुपैयाँको किनबेच भएको छ । कारोबार रकमका आधारमा दोस्रो र तेस्रो स्थानमा क्रमशः नेपाल इन्फ्रास्ट्रक्चर बैंक र जानकी फाइनान्स परेका छन् ।
माण्डु हाइड्रोपावरको शेयरमूल्य १० प्रतिशत बढेको छ जानकी फाइनान्सको शेयरमूल्य १० प्रतिशत घटेको छ ।
बजार घटेसँगै समग्र बजार पूँजीकरण ३५ खर्ब ५३ अर्ब ६७ करोड ७२ लाख ३९ हजार ५१० रुपैयाँ कायम भएको छ ।
