विराटचोकः आज बैंकिङ उपसमूहको परिसूचक सर्वाधिक ३ दशमलव ७४ प्रतिशतले बढे पनि उच्च मूल्य बढ्ने कम्पनीमा भने जलविद्युत समूहका कम्पनी परेका छन् ।
जलविद्युत उपसमूहको परिसूचक पनि ३ प्रतिशतभन्दा बढी बढेको छ । जीवन बीमा, उत्पादन तथा प्रशोधन र व्यापार उपसमूहको परिसूचक २ प्रतिशतभन्दा बढी बढेको छ ।
आज रिडी पावर र माण्डु हाइड्रोपावरको शेयरमूल्य १० प्रतिशतले बढ्दा जानकी फाइनान्स र हिमाल दोलखा हाइड्रोपावर तथा अरुण भ्याली हाइड्रोपावरको शेयरमूल्य पनि ९ प्रतिशतभन्दा बढी बढेको छ । बलेफी हाइड्रोपावरको शेयरमूल्य भने सर्वाधिक ५ दशमलव १२ प्रतिशत घटेको छ ।
नेप्से परिसूचक ५२ दशमलव ९७ अंक बढेर २२५७ दशमलव ५९ बिन्दुमा अडिँदा नेप्सेसँगै कारोबार रकम पनि बढेको छ । बिहीबार ७ अर्ब ८ करोडको शेयर किनबेच भएको थियो भने आज ७ अर्ब ६२ करोड ४ लाख ९८ हजार ५२० रुपैयाँको कारोबार भएको छ । ३०९ कम्पनीको ९६ हजार २७४ पटकको कारोबारमा २ करोड २० लाख ४७ हजार कित्ता शेयर किनबेच भएको थियो ।
कारोबार रकमका आधारमा जानकी फाइनान्स २४ करोड २७ ५८ हजार ५७२ रुपैयाँको शेयर किनबेच गरेर अग्रस्थानमा रहेको छ । एनआरएन इन्फ्रास्ट्रक्चर एण्ड डेभलपमेन्ट, र ग्लोबल आइएमई बैंकको संस्थापक शेयर उच्च कारोबार हुने कम्पनीमा परेका छन् ।
बजार बढेसँगै समग्र बजार पूँजीकरण ३५ खर्ब ८० अर्ब ९३ करोड ६४ लाख २९ हजार ८०९ रुपैयाँ कायम भएको छ । आज सबै उपसमूहमा हरियाली छाएको छ ।
