विराटचोकः बर्खायाम शुरु भएसँगै सुन्दरहरैचा नगरपालिकाले मनसुन पूर्व तयारी तथा प्रतिकार्य कार्ययोजना अनुसार स्थानीय विपद् व्यवस्थापन समितिको बैठक बसी विभिन्न निर्णय गरेको छ ।
नगर प्रमुख केदारप्रसाद गुरागाईको अध्यक्षतामा बसेको विपद् व्यवस्थापन समितिको बैठकले विभिन्न निर्णय गरेको छ ।
जसअनुसार विपद्को अवस्था, पूर्व तयारी, विपद् सम्बन्धी विशेष सहजीकरण गर्न २४ सै घण्टा सेवा प्रवाह गर्ने निर्णय गरेको छ । विपद् व्यवस्थापन सम्पर्क व्यक्तिको रुपमा वासुदेव अधिकारीलाई तोकिएको छ ।
त्यस्तै, सो बैठकले विपद् सहायता केन्द्र स्थापना गर्ने, विपद् व्यवस्थापनका लागि आवश्यक सामाग्री व्यवस्थापन गर्ने र. विपद् पूर्वतयारीका लागि खोला, खोल्सी, बाटाहरुमा अवस्थित रहेका सामग्री हटाउने निर्णय गरेको छ ।
सुन्दरहरैचाभित्र रहेका संकटासन्न क्षेत्र (विपद्को जोखिम क्षेत्र) पहिचान गरी सचेतना कार्यक्रम सञ्चालन गर्ने, सुन्दरहरैचाको वडा नम्बर ३ मा आगलागीबाट क्षति भएको परिवार र वडा नं ४ मा हुरीबतासबाट क्षति भएको परिवारलाई कानुनमा व्यवस्था भए अनुसार आवश्यक सहयोग गर्ने निर्णय पनि आजको बैठकले गरेको छ ।
विपद्को समयमा उद्दार टिमलाई तयारी अवस्थामा राख्न भूपू सैनिक प्रहरी र प्रहरीलाई विशेष प्राथमिकतामा राख्ने तथा राहत सामग्री र पुनस्र्थापना गर्ने स्थानहरुको पहिचान गर्ने निर्णय बैठकले गरेको छ ।
