गोठगाउँः सुन्दरहरैंचामा तीन वटा क्षेत्रले संयुक्त रूपमा नयाँ काम शुरु गर्ने भएका छन् । संघीय सरकारले प्रस्तुत गर्ने बजेट सामुहिक रूपमा सुन्ने, हेर्ने र बहस गर्ने कार्यक्रम आयोजना हुने भएको हो । व्यावसायिक, प्राज्ञिक र सामाजिक क्षेत्रका संस्थाले नौलो कार्यक्रमको अभ्यास गर्ने भएका हुन् ।
सुन्दरहरैंचा उद्योग वाणिज्य संघ, सुकुना बहुमुखी क्याम्पस र इन्द्रपुर जेसीजले संयुक्त रूपमा नौलो कार्यक्रमको थालनी गर्ने भएका हुन् । सुन्दरहरैंचा उद्योग वाणिज्य संघ नगरको मात्रै नभएर पूर्वकै प्रतिष्ठित वाणिज्य संघको रुपमा रहेको छ । संघले विभिन्न आन्दोलनका नाममा हुने गरेका राजनीतिक बन्द, हड्तालको विरोध गर्दै विराटचोकलाई बन्द निषेधित क्षेत्र घोषणा गरी सफल कार्यान्वयन गरेको थियो । सुकुना बहुमुखी क्याम्पस नगरको मात्रै नभएर पूर्वकै गहनाको रूपमा रहेको शिक्षालय हो । ४ हजारभन्दा बढी विद्यार्थी अध्ययनरत क्याम्पस गुणस्तरीय शिक्षाका लागि चर्चित छ । इन्द्रपुर जेसीज नगरमा सामाजिक जागरण ल्याउन सक्रिय संस्था हो ।
बजेट भाषण शुरु भएपछि जेठ १५ गते दिउँसो १ बजेदेखि औपचारिक रूपमा बहस शुरु गरिने भएको हो । सुन्दरहरैंचा १० मा रहेको प्लानेट लाउञ्जमा आयोजना हुने कार्यक्रममा सहभागी हुन आयोजक संस्थाले आह्वान गरेका छन् ।
