बेलबारीः सोमबार बिहान ८ बजेतिर मोरङको बेलबारी नगरपालिका वडा नम्बर ११ स्थित भाउन्नेको जंगलमा हात्तीले आक्रमण गर्दा लेटाङ ३ कीर्तीमानका अन्दाजी ५० वर्षीय कमल माझीको मृत्यु भएको छ ।
कीर्तीमानबाट लक्ष्मीमार्ग जाने भित्री बाटोमा उनलाई बटुवाले देखेर विहान १० बजेतिर प्रहरीलाई खबर गरेका थिए । प्रहरी घटनास्थल पुग्दा माझीलाई मृत अवस्थामा भेटेको थियो ।
घटनास्थल छेउछाउमा हात्तीका पाइलहरु देखिएको, झाडी मडारिएको पाइएको तथा आसपासमा हात्तीहरु समेत देखिएकाले घटनाको प्रकृति हेर्दा हात्तीकै आक्रमणबाट मृत्यु भएको हुन सक्ने प्रहरीले जनाएको छ ।
मृतक व्यक्तिले विहान ८ बजेतिर घरपरिवारमा फोन गरेको तर नेटवर्क राम्रो नभएकाले स्पष्ट नबुझिएको भनि घर परिवारले बताएकाले घटना विहान ८ बजेतिर भएको देखिएको प्रहरीले जानकारी दिएको छ ।
मृतक व्यक्तिले घरेलु मदिरा बनाउन प्रयोग गरिने मर्चा लगायतका सामाग्री लिएर साइकलमा लक्ष्मीमार्गमा लाग्ने बजारतर्फ हिँंडेको बुझिएको छ । मृतकको खुट्टाको हड्डी भाँचिएको पाइएको र अन्यत्र बाहिरी चोट नदेखिएको प्रहरीले जानकारी दिएको छ ।
