भेडेटारः तरकारी बोक्न प्रयोग भएको गाडीबाट प्रहरीले ५ सय ४४ केजी गाँजा बरामद गरेको छ ।
धनकुटाको साँगुरीगढी –९ स्थित भेडेटारबाट प्रहरीले गाँजा बरामद गरेको हो । विशेष सूचनाका आधारमा प्रहरीले सो सवारीमा जाँच गरेको थियो ।
आइतबार राती पौने ८ बजे इलाका प्रहरी कार्यालय भेडेटारका प्रमुख प्रहरी नायब निरीक्षक जीवन कार्की नेतृत्वको प्रहरी टोलीले भेडेटार चोकमा को १ ख ३२९४ नम्बरको मिनी ट्रक रोकेर सवारी जाँच गर्दा तरकारीको बोराभित्र प्याक गरी लुकाइछिपाई राखेको ५ सय ४४ केजी गाँजा फेला परेको थियो ।
प्रहरीले सवारीमा रहेका ५ बोरा आलु, साग तथा सब्जी बोक्ने खाली क्यारेट पनि बरामद गरेको छ । सवारी साधन नियन्त्रणमा लिइए पनि चालक तथा सहचालक हामफालेर फरार भएकाले खोजी भइरहेको प्रहरीले जनाएको छ ।
