विराटचोकः आज काठमाडौं उपत्यकामा घोडेजात्रा मनाइन्छ । घोडेजात्रा मनाइने हुनाले काठमाडौं उपत्यकामा आज सार्वजनिक बिदा दिइएको छ ।
पछिल्लो समय सुन र चाँदीको मूल्य पनि घोडा झैँ दौडिइरहेको छ । हिजो तोलामा २ हजार ९ सय रुपैयाँ बढेर नयाँ कीर्तिमानी मूल्य कायम भएको सुनचाँदीको भाउले आज सो कीर्तिमानी भङ्ग गरेको छ र नयाँ कीर्तिमानी मूल्यको बिन्दु तय गरेको छ । सुनको भाउ आज तोलामा ६०० रुपैयाँ र चाँदीको भाउ तोलामा १५ रुपैयाँ बढेको छ ।
नेपाल सुनचाँदी व्यवसायी महासंघका अनुसार आज छापावाल सुनको भाउ प्रति तोला १ लाख ३६ हजार २०० रुपैयाँ निर्धारण भएको छ । तेजाबी सुनको भाउ प्रति तोला १ लाख ३५ हजार ५५० रुपैयाँ र चाँदीको भाउ प्रति तोला १ हजार ६८५ रुपैयाँ निर्धारण भएको छ ।
हिजो सुनको भाउ तोलामा २ हजार ९ सय रुपैयाँ र चाँदीको भाउ तोलामा ५५ रुपैयाँ बढेको थियो ।
पछिल्ला दिनमा सुन र चाँदीको भाउ लगातार बढेर नयाँ कीर्तिमानी मूल्य कायम गरिरहेको छ ।
