बलियाः सुन्दरहरैँचा नगरपालिकाले व्यवसाय दर्ता तथा नवीकरण अभियान शुरु गरेको छ । सोमबार नगरपालिकाको वडा नम्बर ४ बलियामा अभियानको शुरुवात नगरप्रमुख केदारप्रसाद गुरागाईले गर्नुभयो ।
नगरपालिकाभित्र सञ्चालनमा रहेका तर दर्ता नभएका व्यवसायलाई सहजताका लागि घरमै पुगेर सेवा दिने उद्देश्यले अभियान सञ्चालन गरेको उहाँको भनाइ थियो । पसलमै पुगेर व्यवसायीलाई दर्ता प्रमाणपत्र दिइएको थियो ।
अभियानमा वडा नम्बर ४ का वडाध्यक्ष कैलाश बस्नेत, सुन्दरदुलारी उद्योग वाणिज्य संघका अध्यक्ष जीवनप्रसाद ढुंगाना, कार्यपालिका सदस्य दुर्गा पोख्रेल, वडा सदस्य, कर्मचारी लगायतको उपस्थिति रहेको थियो ।
नगरपालिकाका राजस्व शाखा प्रमुख राजन रेग्मीका अनुसार पहिलो दिन १५ वटा नयाँ व्यवसाय दर्ता र २ वटा नवीकरण भएका थिए ।
