विराटचोकः स्थानीय सुकुना बहुमुखी क्याम्पस सुन्दरहरैँचामा शुक्रबार क्याम्पसमा अध्ययनरत विद्यार्थीहरूबीच मुक्तक वाचन प्रतियोगिता सम्पन्न भएको छ ।
अतिरिक्त क्रियाकलाप समिति र नेपाली विभाग अन्तर्गतको अतिरिक्त क्रियाकलाप उपसमितिको आयोजनामा भएको मुक्तक वाचन प्रतियोगितामा २४ जना विद्यार्थीहरूले मुक्तक वाचन गरेका थिए ।
कार्यक्रममा प्रमुख अतिथि क्याम्पस सञ्चालक समितिका अध्यक्ष केशव अधिकारीले प्रतियोगिताको उद्घाटन गर्नुभयो । नेपाली विभागका प्रमुख गेहेन्द्र खनालले कार्यक्रमको औचित्य र महत्व प्रस्तुत गर्नुभएको थियो । शिक्षक शोभा बस्नेतले स्वागत मन्तव्य राख्नुभएको थियो । विशिष्ट अतिथि क्याम्पस प्रमुख अर्जुनराज अधिकारीले प्रत्येक दुई÷दुई महिनामा यस्ता साहित्यिक कार्यक्रम गर्नेतर्फ क्याम्पस लाग्नेमा बताउनुभयो ।
प्रतियोगितामा दिलकुमार सुयल‚ सत्तिस कार्की, एलिना थापा र सज्जल भट्टराईले क्रमश पहिलो, दोस्रो, तेस्रो र सान्त्वना स्थान हात पारे ।
कार्यक्रमको सञ्चालन शिक्षण सहायक रेखा सुवेदीले गर्नुभएको थियो । विदुर सुवेदीको सभापतित्वमा कार्यक्रम सम्पन्न भएको थियो ।
