विराटचोकः बिहीबार नेपाल स्टक एक्सचेञ्ज (नेप्से)ले सूचीकृत कम्पनीहरूको वर्गीकरण गरेको छ । नेप्सेले आर्थिक वर्ष २०८०\८१ पुस मसान्त सम्म अद्यावधिक विवरणअनुसार २७१ कम्पनीको वर्गीकरण सार्वजनिक गरेको हो ।
१२ जीवन बीमा कम्पनी, १२ निर्जीवन बीमा कम्पनी र दुई पुनर्बीमा कम्पनी नेप्सेमा सूचीकृत छन् । नेप्सेले सूचीकृत कम्पनीहरूको वित्तीय अवस्था, लाभांश वितरण, चुक्तापूँजीको अवस्था र साधारण सभा समयमा नै गरे\नगरेको अवस्था हेरेर ‘ए’, ‘बी’, ‘जी’ र ‘जेड’ गरी कुल चार वर्गमा सूचीकृत कम्पनीहरूलाई विभाजन गरेको छ ।
नेप्सेका अनुसार बीमा कम्पनीहरूमध्ये नेपाल इन्स्योरेन्स मात्रै ‘ए’ वर्गमा परेको छ ।
कम्पनीको धितोपत्र नेप्सेमा सूचीकृत भएको तीन वर्ष भएको, विगत तीन आर्थिक वर्ष लगातार नाफामा रहेर १० प्रतिशतका दरले लाभांश वितरण गरेको, नियमनकारी निकाय बीमा प्राधिकरणले तोकेको ढाँचामा वित्तीय विवरण राखेको र आव समाप्त भएको ६ महिनाभित्र वार्षिक साधारण सभा सम्पन्न गरेकाले वर्ग ‘ए’ भित्र परेको नेप्सेले जनाएको छ ।
नेप्सेका अनुसार वर्ग ‘बी’मा भने कुनै पनि बीमा कम्पनी परेका छैनन् । कम्तीमा तीन अर्ब रुपैयाँ चुक्तापूँजी, नेप्सेमा सूचीकृत भएको ३ वर्ष भएको, विगत ३ वर्षमा कम्तीमा दुई आर्थिक वर्षमा नाफा गरेको, आव सकिएको ६ महिनाभित्र वार्षिक साधारण सभा सम्पन्न गरेको र सञ्चित नोक्सानी नरहेका कम्पनीहरू वर्ग ‘बी’ मा परेका छन् ।
‘जी’ ग्रुपमा ५ बीमा कम्पनी परेका छन् । आइएमई लाइफ, रिलायबल नेपाल लाइफ, सिटिजन लाइफ, सन् नेपाल लाइफ र हिमालयन रिइन्स्योरेन्स नेप्सेमा सूचीकृत भएको दुई वर्ष पूरा नभएसम्म वर्ग ‘जी’मा पर्ने नेप्सेले जनाएको छ ।
‘जेड’ समूहमा नेपाल रिइन्स्योरेन्ससहित १९ बीमा कम्पनी परेका छन् ।
नेप्सेमा सूचीकृत २७१ कम्पनीहरूको वर्गीकरण, ३१ कम्पनी समूह ‘ए’ मा
