लेटाङः आर्थिक वर्ष २०७६÷२०७७ साल को बजेटमा नदी पथान्तरण आयोजना अन्तर्गत तमोरको पानी चिसाङ खोलामा झार्नका लागि प्रारम्भिक सम्भाव्यता अध्ययन गर्न भनी बजेट विनियोजन गरी राष्ट्रिय गौरवको योजनाको रुपमा समावेश गरिएको थियो । त्यसपछि तमोर चिसाङ बहुउद्देश्यीय परियोजनाको रुपमा हरेक वर्ष बजेटमा सम्बोधन हुँदै आएको थियो । योजनाको प्रारम्भिक सम्भाव्यता अध्ययन सम्पन्न भएको छ ।
तमोर नदीमा डाइभर्सन बनाउनका लागि पाँचथरको कुम्मायक गाउँपालिका र तेह्रथुमको छथर गाउँपालिका आसपासको प्रभाव क्षेत्रमा जग्गा अधिग्रहणका लागि प्रकृया समेत अघि बढाइएको बताइएको छ । प्रारम्भिक सम्भाव्यता अध्ययन सकेर हाल विस्तृत परियोजना अध्ययनको काम अघि बढेको बताइएको छ ।
तमोरदेखि मोरङको लेटाङ १ लोखरा आसपासको क्षेत्रसम्म २५ किलोमिटर सुरुङ बनाई ४७ मेगावाट बिजुली उत्पादनका लागि पावरहाउस पनि लोखरा क्षेत्रमै निर्माण हुनेछ । लोखरा आसपासकै क्षेत्रमा चिसाङ खोलामा बाँध बनाई पूर्व र पश्चिमतर्फ २ वटा नहर सञ्चालन हुने भएका छन् । ती नहरको सिञ्चित क्षेत्र पूर्वमा झापको कन्काइ र पश्चिममा कोशी नदी आसपासको क्षेत्रसम्म गरी जम्मा १ लाख ७ हजार हेक्टर क्षेत्रमा सिँचाइ सुविधा उपलब्ध हुने बताइएको छ ।
