उर्लाबारीः उर्लाबारी बहुमुखी क्याम्पसको वाणिज्य विभागको आयोजनामा वाणिज्य सङ्कायका विद्यार्थीहरूको शैक्षिक भ्रमण सम्पन्न भएको छ । भ्रमणपछि आयोजित समीक्षा कार्यक्रममा विद्यार्थीहरूले उद्योग, व्यवसाय र पर्यटन क्षेत्रबारे प्राप्त व्यावहारिक अनुभव आदानप्रदान गरेका छन् ।
भ्रमण टोलीले झापाका विभिन्न स्थानको अवलोकन गर्दै उद्योग, व्यवसाय र पर्यटनसँग सम्बन्धित व्यावहारिक ज्ञान हासिल गरेको जनाएको छ ।
व्यावहारिक अनुभव आदानप्रदान कार्यक्रममा बोल्दै क्याम्पस प्रमुख खेमराज कार्कीले यस्ता शैक्षिक भ्रमणले विद्यार्थीको ज्ञान, सीप र व्यावहारिक क्षमता अभिवृद्धिमा महत्वपूर्ण योगदान पुग्ने बताउनुभयो । भ्रमणबाट प्राप्त अनुभवलाई व्यवहारमा उतार्न र हरेक असल अभ्यासबाट सिक्न विद्यार्थीलाई उहाँले आग्रह गर्नुभयो ।
क्याम्पसले आगामी दिनमा उद्यमशीलतामूलक कार्यक्रम सञ्चालन गर्ने योजना रहेको जानकारी दिँदै सीप हासिल गरी व्यवहारमा लागू गर्न सके युरोप र अमेरिका जानुपर्ने बाध्यता कम गर्न सकिने उहाँको भनाइ थियो । विद्यार्थीलाई अनुशासित, नैतिकवान र प्रविधिमैत्री बन्न आग्रह गर्दै अध्ययनलाई भविष्य निर्माणको आधारका रूपमा गम्भीरतापूर्वक लिनुपर्ने उहाँले बताउनुभयो ।
भ्रमणमा सहभागी विद्यार्थीहरूले यस कार्यक्रमबाट अवलोकन तथा विश्लेषण गर्ने क्षमता, समूहमा काम गर्ने सीप, प्रभावकारी सञ्चार कला, व्यवसाय सञ्चालनसम्बन्धी व्यावहारिक बुझाइ तथा आत्मविश्वास बढेको अनुभव सुनाएका थिए ।
विद्यार्थी नमूना पराजुलीले यस्ता शैक्षिक भ्रमणले कक्षाकोठामा सिकेका विषयलाई व्यवहारमा बुझ्न सहज भएको बताउँदै आगामी दिनमा पनि यस्ता कार्यक्रमलाई निरन्तरता दिन क्याम्पस प्रशासनसँग आग्रह गर्नुभएको थियो ।
भ्रमण टोलीले हनुमान बेकरी उद्योगमा बेकरी उत्पादनको निर्माण प्रक्रिया, गुणस्तर नियन्त्रण, सरसफाइ व्यवस्थापन, प्याकेजिङ तथा ब्रान्डिङ प्रविधि, वितरण प्रणाली र बजार व्यवस्थापन रणनीतिबारे प्रत्यक्ष जानकारी लिएको थियो । विद्यार्थीहरूले उद्योग सञ्चालनका विभिन्न पक्ष नजिकबाट अवलोकन गर्दै उद्यमशीलताको व्यावहारिक पक्ष बुझ्ने अवसर पाएको बताएका छन् ।
त्यसैगरी, दमक बिजनेस टावरको अवलोकनका क्रममा व्यावसायिक वातावरण, व्यापारिक गतिविधि, ग्राहक सेवा, व्यवसाय व्यवस्थापन तथा आधुनिक पूर्वाधारले व्यवसाय विकासमा खेल्ने भूमिकाबारे जानकारी प्राप्त भएको विद्यार्थीले बताए । दमक भ्यु टावरको भ्रमण गर्दै पर्यटन पूर्वाधारको विकास, पर्यटकीय सम्भावना र स्थानीय आर्थिक गतिविधिमा पर्यटनले पुर्याउने योगदानबारे समेत जानकारी पाएको उनीहरुको भनाइ थियो ।
भ्रमण टोलीले मेची हाउजिङको पनि अवलोकन गरेको थियो । ५५ वटा आधुनिक सुविधासम्पन्न घर रहेको उक्त हाउजिङ व्यवस्थित पूर्वाधार, आकर्षक भवन संरचना र योजनाबद्ध बस्ती विकासका कारण नमूना आवासीय क्षेत्रका रूपमा विकास भइरहेको जानकारी विद्यार्थीहरूले प्राप्त गरेका थिए ।
विभाग प्रमुख रत्न कार्कीको नेतृत्वमा सम्पन्न भ्रमणमा क्याम्पस प्रमुख खेमराज कार्की प्रमुख अतिथिका रूपमा सहभागी थिए । कार्यक्रममा प्राध्यापक राजु सापकोटा र प्रकाश पौडेल पनि सहभागी हुनुहुन्थ्यो ।
