विराटचोकः सरकारले हिजो प्रस्तुत गरेको आगामी आर्थिक वर्ष २०८३\८४ को बजेटमा कोशी प्रदेशमा भौतिक पूर्वाधार, ऊर्जा र पर्यटन क्षेत्रलाई प्राथमिकता दिएको छ ।
सवा २१ खर्बको बजेट प्रस्तुत हुँदा कोशी प्रदेशमा पर्ने पूर्वपश्चिम राजमार्ग, कोशी राजमार्ग, हुलाकी राजमार्ग र मदन भण्डारी राजमार्गका लागि बजेट विनियोजन भएको छ ।
कोशी करिडोरको उत्तरी खण्डको १५ किलोमिटर सडक कालोपत्रे गर्ने लक्ष्य बजेटमा छ । तमोर सडक विस्तार पनि सरकारको प्राथमिकतामा छ । संखुवासभामा निर्माणाधीन र प्रस्तावित जलविद्युत आयोजनाहरूलाई प्राथमिकतामा राखिएको छ ।
१ हजार ६१ मेगावाट क्षमताको माथिल्लो अरुण जलविद्युत आयोजनाको वित्तीय व्यवस्थापन टुङ्ग्याएर ठेक्का प्रक्रिया शुरु गरिने बजेटमा उल्लेख छ । ९०० मेगावाटको अरुण तेस्रो र ६६९ मेगावाटको तल्लो अरुण आयोजनाको निर्माण कार्यलाई थप सहजीकरण गरी समयमा नै सम्पन्न गरिने भएको छ ।
झापाको मेचीनगरमा राष्ट्रिय आवास कम्पनीमार्फत् १०० वटा आवास निर्माण गरी नागरिकलाई बिक्री गर्ने लक्ष्य बजेटमा राखेको छ ।
दमक, धरान र इटहरीमा खानेपानी तथा ढल निकास र प्रशोधन आयोजना सञ्चालन गर्ने तथा संखुवासभाको खाँदबारीमा ढल प्रशोधन केन्द्र स्थापना गरी सञ्चालनमा ल्याइने भएको छ ।
सुनसरी–मोरङ सिँचाइ आयोजना मर्मत सम्भार गरी सिँचाइ सुविधालाई व्यवस्थित बनाइने भएको छ ।
विराटनगरमा २ हजार दर्शक क्षमताको मल्टिपर्पोज रंगशाला निर्माण गरिने तथा गिरिजाप्रसाद कोइराला स्टेडियमको लगानी मोडेल तयार गरी निर्माण प्रक्रिया अघि बढाइने भएको छ ।
हलेसी–चतरा– पाथीभरा प्रादेशिक पर्यटकीय करिडोर निर्माण गर्ने तथा गुराँसको राजधानी मानिने तीनजुरेदेखि पाथीभरासम्मको ट्रेकिङ रुट निर्माण कार्यलाई सरकारले बजेटमा समेटेको छ ।
अन्य प्रदेशको तुलनामा सरकारले कोशी प्रदेशमा कम बजेट विनियोजन गरेको छ ।
