विराटचोकः देशकै अब्बल शैक्षिक सस्थाको रुपमा रहेको मोरङको सुन्दरहरैँचास्थित सुकुना बहुमुखी क्याम्पसले उच्च शिक्षा, प्रशासनिक क्षमता विकास तथा शैक्षिक–औद्योगिक सहकार्यलाई सुदृढ बनाउने उद्देश्यसहित दुई महत्वपूर्ण कार्यक्रम आयोजना गर्ने भएको छ ।
क्याम्पस प्रमुख अर्जुनराज अधिकारीका अनुसार आज र भोलि “एकेडेमिया–इन्डस्ट्री डाइलग ः म्भखभयिउष्लन ब च्भकष्ष्भिलत ध्यचपायचअभ” कार्यक्रम सञ्चालन हुनेछ । कार्यक्रममा विश्वविद्यालय, उद्योग, बैंकिङ, उद्यमशीलता तथा शिक्षा क्षेत्रका विज्ञहरूको सहभागिता रहने जनाइएको छ ।
सो कार्यक्रममार्फत् उच्च शिक्षालय र उद्योग क्षेत्रबीच सहकार्य विस्तार, रोजगारमुखी शिक्षा, उद्यमशीलता विकास तथा दक्ष जनशक्ति उत्पादनका विषयमा व्यापक छलफल गरिने भएको छ । कार्यक्रममा मधेश विश्वविद्यालयका डीन डा. अञ्जयकुमार मिश्र, पूर्वाञ्चल विश्वविद्यालयका उपकुलपति प्रा.डा. बिजु थपलिया, किस्स कलेजका अध्यक्ष नरोत्तम अर्याल तथा सहकारी विकास बैंकका सीईओ बद्रीकुमार गुरागाईंलगायतले सहजीकरण गर्ने जनाइएको छ । कार्यक्रममा शिक्षक, विद्यार्थी, स्थानीय उद्योगी, छिमेकी क्याम्पसका प्रतिनिधिलगायतको सहभागिता रहने बताइएको छ ।
आजदेखि नै तीन दिनसम्म क्याम्पसले प्रशासनिक कर्मचारीहरूको क्षमता अभिवृद्धिका लागि तालिम सञ्चालन गर्ने भएको छ । हल नं. ३ मा आयोजना हुने तालिममा गुणस्तर सुनिश्चितता (क्युएए) प्रक्रिया, अभिलेखीकरण, डिजिटल सीप विकास, सार्वजनिक खरिद प्रक्रिया, समस्या समाधान सीप, कार्यस्थलमा आवश्यक सामान्य सीप तथा व्यक्तित्व विकाससम्बन्धी विषयमा प्रशिक्षण दिइने बताइएको छ ।
