काँकरभिट्टाः प्रहरीले मेचीनगर नगरपालिका–६ स्थित बसपार्क नजिकैबाट १ लाख १८ हजार नगदसहित एक युवालाई बेहोश अवस्थामा उद्धार गरेको छ ।
अत्यधिक मादक पदार्थ सेवन गरी शनिबार साँझ छ बजेतिर सडकमा बेहोश भएर लडिरहेको अवस्थामा उनी फेला परेका थिए । फेला पर्नेमा पाल्पाको रामपुर गाउँपालिका–२ का ३२ वर्षीय हरि थापा रहेका छन् ।
उनलाई इलाका प्रहरी कार्यालय काँकरभिट्टाको टोलीले उद्धार गरी उपचारका लागि तत्काल धुलाबारीस्थित आम्दा अस्पताल लगिएको थियो । उपचारपछि अस्पतालबाट ‘डिस्चार्ज’ भएका उनी हालसम्म प्रहरीको सम्पर्कमा नआएको प्रहरीले जनाएको छ ।
उनको साथबाट बरामद गरिएको नगद इलाका प्रहरी कार्यालय काँकरभिट्टामा सुरक्षित राखिएको र उनको मोबाइल नम्बरमा सम्पर्क गर्न प्रयास गरे पनि सम्पर्क हुन नसकेको जिल्ला प्रहरी कार्यालय झापाले जनाएको छ ।
भारतबाट नेपाल फर्केका थापाले शनिबार नेपाल–भारत बस सेवाबाट रात्रिबसमार्फत् काठमाडौं जाने गरी टिकट लिइसकेका थिए । नशाले लट्ठिएपछि उनको बस छुटेको थियो ।
