विराटचोकः रसुवा जिल्लाको उच्च भागमा अवस्थित पवित्र तीर्थस्थल गोसाइँकुण्डमा आजदेखि विशेष मेला शुरु भएको छ ।
गङ्गा दशहरा पर्वअन्तर्गत आरम्भ भएको विशेष मेला १० दिन लाग्ने गर्दछ । मेला भर्नका लागि टाढा टाढाबाट आएका भक्तजनले आज बिहानैदेखि कुण्डमा स्नान तथा भगवान् शिवको पूजा आरधना गर्छन् । शिवको दर्शन गर्नाले आफ्ना मनोकाङ्क्षा पूरा हुने धार्मिक विश्वास रहिआएको छ ।
निलाद्री पर्वत अर्थात् गोसाइँकुण्ड तीर्थ समुद्री सतहबाट ४ हजार ३८० मिटरको उचाइमा रहेको छ । पवित्र कुण्डमा स्नान गर्दा शारीरिक रोगव्याधसमेत हट्ने मान्यता रहिआएको छ ।
कालकुट विषपान गरी प्राणी बचाउने शिवको दर्शनका लागि एक पटक गोसाइँकुण्ड पुग्नै पर्ने मान्यता रहिआएको छ ।
उत्तरगया धाम बेत्रावती पुगेर स्नान तथा गङ्गा पूजन गरी गोसाइँकुण्ड जानुपर्ने, चोलाङ पाटीमाथि बाटोमा ढुङ्गा राखेर घर बनाउने र लौरी विनायकमा लौरी चढाइ गोसाइँकुण्ड जानुपर्ने, कुण्डमा भगवानको दर्शन गरी फर्किदा ल्याएको जल धैबुङस्थित कालिका मन्दिरमा चढाएर घर जाँदा पुण्य मिल्ने मान्यता रहेको स्थानीय बताउँछन् ।
समुद्र मन्थन गर्दा निस्केको कालकुट विष सेवनका कारण भएको छटपटी र डाहा शान्त पार्न जलको खोजी गर्दै भगवान् शिव निलाद्रि पर्वत (गोसाइँकुण्ड) पुग्नुभएको धार्मिक मान्यता रहेको छ ।
त्रिशुल प्रहारबाट निलाद्री पर्वतमा जल उत्पन्न गराई पानीको प्यास मेट्नु भई त्यही जलले बनेको पोखरीमा शिव शङ्कर भगवान् विराजमान रहेको किंवदन्ती छ । त्रिशुल प्रहारबाट उत्पन्न जल बगेको हुनाले सो नदीलाई त्रिशुली भनिन्छ । त्रिशुलीको मुहान गोसाइँकुण्ड हो ।
