विराटचोकः राष्ट्रिय स्वतन्त्र पार्टीका नेता तथा गृहमन्त्री सुधन गुरुङले कार्यकालको एक महिना पनि पूरा नगरी गत बुधबार राजीनामा दिएका छन् । शंकास्पद व्यापारीसँगको रहस्यमय आम्दानीबाट शेयर लगानी गरेकोमा प्रश्न आएसँगै गुरुङ राजीनामा दिन बाध्य भएका हुन् ।
योसँगै रास्वपाबाट शुरुमा गृहमन्त्री हुनेले धेरै समय काम गर्न नपाएको भनी टिप्पणी हुन थालेको छ ।
गृह मन्त्रालयको वेबसाइटमा उल्लेख भएअनुसार १३ माघ २०७९ मा तत्कालीन रास्वपाका सभापति तथा प्रचण्ड सरकारका गृहमन्त्री रवि लामिछानेले पनि ३२ दिनमा नै गृहमन्त्री पदबाट राजीनामा दिएका थिए ।
२०७९ सालको ११ पुसमा उपप्रधानमन्त्रीसहित गृहमन्त्री भएका रविले ३२ दिनमा सर्वोच्च अदालतले सांसद हुन अयोग्य फैसला गरेपछि राजीनामा दिएका थिए ।
नेपाली र अमेरिकी दुवै पासपोर्ट एकै पटक प्रयोग गरको मुद्दामा उनी सांसद बन्न अयोग्य ठहरिएका थिए ।
अहिले सुधन गुरुङ शेयर लगानीसँग सम्बन्धित विषयमा विवादित भएपछि २७ दिनमै मन्त्रिमण्डलबाट बाहिरिएका हुन् ।
