विराटचोकः थ्रीजी सेवा क्रमिक रूपमा बन्द गर्दै फोरजीमा क्रमशः रूपान्तरण गर्ने गरी नेपाल टेलिकमले कार्य अघि बढाएको छ ।
नेपाल टेलिकमले थ्रीजी सिम प्रयोगकर्ता ग्राहकहरूलाई सिम परिवर्तनका लागि फोन तथा एसएमएस मार्फत जानकारी गराइरहेको छ । सम्बन्धित ग्राहकहरूले आफ्नो पुरानो सिमलाई फोरजी सिममा निःशुल्क रूपान्तरण गर्न सक्ने व्यवस्था टेलिकमले गरेको हो ।
ग्राहकले पायक पर्ने नजिकको दूरसञ्चार कार्यालयमा सम्पर्क गरी सेवा अद्यावधिक गर्न सकिने टेलिकमले जनाएको छ । फोरजीमा सिम परिवर्तन गर्न ग्राहकले नागरिकताको प्रमाणपत्र, राष्ट्रिय परिचयपत्र, राहदानी, सवारी चालक अनुमतिपत्र लगायत आफ्नो पहिचान खुल्ने कुनै आधिकारिक परिचयपत्रहरु देखाएर नयाँ फोरजी सिम लिन सकिने व्यवस्था टेलिकमले गरेको हो ।
आफ्नो सिम फोरजी प्रविधिको हो वा होइन भन्ने थाहा पाउनका लागि *४४४# डायल गर्न सकिने कम्पनीले जनाएको छ ।
