विराटचोकः उतारचढावका बीच बुधबार बजार १२ दशमलव १० अंकले घटेर २ हजार १६३ दशमलव ०६ विन्दुमा बन्द भएको छ । नेप्सेमा सूचीकृत मध्ये ३०० वटा कम्पनीको ३ करोड ३५ लाख २५ हजार ७०२ कित्ता शेयर २ लाख १० हजार ४७१ पटक किनबेच हुँदा ९ अर्ब ७६ करोड ८९ लाख ६९ हजार ८६८ रुपैयाँको शेयर कारोबार भएको छ ।
नेप्सेमा सूचीकृत १३ वटा समूहमध्ये अन्य, लघुवित्त, विकास बैंक, बैंकिङ समूहबाहेक अरु सबैमा रातो पोतिँदा अन्य समूह भने सर्वाधिक १ दशमलव ४९ प्रतिशतले बढेको छ । सबैभन्दा धेरै वित्त समूह ३ दशमलव ५१ प्रतिशतले घटेको छ ।
अघिल्लो महिनादेखि कारोबारमा आएको हिमालयन रिइन्स्योरेन्सको आज सबैभन्दा बढी ६५ करोड ८४ लाख ९० हजार २८५ रुपैयाँको कारोबार भएको छ । ङादी ग्रूप पावर, सोनापुर मिनरल्स एन्ड आयल र मुक्तिनाथ कृषि कम्पनी उच्च कारोबार गर्ने कम्पनीमा परेका छन् ।
बजार घटे पनि हिमालयन रिइन्स्योरेन्स, ग्लोबल आइएमई लघुवित्त वित्तीय संस्था र नेपाल वेयरहाउजिङ कम्पनीको शेयरमूल्य १० प्रतिशतले बढेको छ । ईष्टर्न हाइड्रोपावर, मुक्तिनाथ कृषि कम्पनी र भूगोल इनर्जी पावरको शेयरमूल्य १० प्रतिशतले घटेको छ ।
बजार घटेसँगै समग्र बजार पूँजीकरण ३३ खर्ब ९७ अर्ब ४१ करोड १८ लाख ६२ हजार ४३५ रुपैयाँ कायम भएको छ ।
