विराटनगरः नवनियुक्त प्रधानमन्त्री बालेन्द्र शाहको नेतृत्वमा शुक्रबार गठन भएको १५ सदस्यीय मन्त्रिपरिषदमा राष्ट्रिय स्वतन्त्र पार्टी (रास्वपा)की समानुपातिक सांसद निशा मेहताले स्वास्थ्य तथा जनसङ्ख्या एवं खानेपानी मन्त्रालयको जिम्मेवारी पाएकी छिन् ।
पेशाले नर्स रहेकी ३८ वर्षीया मेहता सुनसरीको इनरुवाकी हुन् । उनले भारतको ग्वालियरबाट नर्सिङमा स्नातकोत्तर गरेकी छिन् । राजनीतिमा प्रवेश गर्नुअघि उनी विराटनगरस्थित विराट मेडिकल कलेज टिचिङ हस्पिटलमा उपप्राध्यापकका रूपमा कार्यरत थिइन् । निर्वाचन आयोगबाट सांसदको प्रमाणपत्र प्राप्त गरेपछि मात्र उनले आफ्नो नर्सिङ पेशाबाट राजीनामा दिएकी हुन् ।
आफ्नै संस्थाकी पूर्वउपप्राध्यापक मेहता स्वास्थ्यमन्त्री नियुक्त भएपछि विराट मेडिकल कलेज टिचिङ हस्पिटल परिवार हर्षित बनेको छ । संस्थापक अध्यक्ष प्रा.डा. ज्ञानेन्द्रमान सिंह कार्कीले मेहताको नियुक्ति संस्थाका लागि गौरवको क्षण भएको बताउँदै उनको सफल मन्त्रित्वकालको कामना गरेका छन् । हस्पिटलमा उपप्राध्यापकका रूपमा कार्यरत हुँदा नर्सिङ शिक्षा र स्वास्थ्य सेवामा उनले पुर्याएको योगदानलाई संस्थाले सधैँ स्मरण गर्ने डा. कार्कीको भनाइ छ ।
मेहताले मन्त्रालयको नेतृत्व गर्दा स्वास्थ्य क्षेत्रमा सकारात्मक परिवर्तन ल्याउने विश्वास व्यक्त गर्दै हस्पिटल परिवारले उनलाई हार्दिक बधाई तथा उज्ज्वल भविष्यको शुभकामना दिएको छ ।
रास्वपाको स्थापनाकालदेखि नै सक्रिय मेहता पार्टीकी केन्द्रीय सदस्य समेत हुन् । उनका श्रीमान् डा. सरोज सिंह कोशी प्रदेश प्रहरी अस्पतालका प्रमुख तथा प्रहरी नायब उपरीक्षक (डीएसपी) हुन् ।
स्वास्थ्यमन्त्रीका लागि पार्टीभित्र अन्य चिकित्सक सांसदहरूको पनि चर्चा भए तापनि प्रधानमन्त्री बालेन्द्र शाह र सभापति रवि लामिछानेले मेहतालाई नै यो जिम्मेवारी दिने निर्णय गरेका हुन् ।
