विराटनगरः कोशी प्रदेशबाट मन्त्री हुने एक मात्र मन्त्री भएकी छिन् निशा मेहता । स्वास्थ्य तथा जनसङ्ख्या मन्त्री बनेकी छिन् ।
सुनसरीको इनरूवाकी उनी रास्वपा केन्द्रीय सदस्यसमेत हुन् । उनी समानुपातिकबाट प्रतिनिधिसभा सदस्य निर्वाचित भएकी हुन् । उनको नाम समानुपातिकतर्फ पार्टीले २०७९ को निर्वाचनमा पनि राखेको थियो ।
२०४४ साल साउन २२ गते इनरूवामा जन्मेकी उनी रास्वपामा स्थापनाकालदेखि नै सक्रिय थिइन् । उनले भारतको ग्वालियरस्थित विश्वविद्यालयबाट नर्सिङमा स्नातकोत्तर गरेकी छिन् ।
प्रतिनिधि सभा सांसद निर्वाचित हुनुअघिसम्म उनले विराट टिचिङ अस्पतालमा काम गरेकी थिइन् । उनले नेपाल प्रहरी श्रीमती संघ कोशी प्रदेशको प्रशासन सचिवका रूपमा स्वास्थ्य शिविर सञ्चालनमा पनि भूमिका खेलेकी थिइन् ।
मेहताका श्रीमान् डा. सरोज सिंह हुन् । प्रहरी नायव उपरीक्षक सरोज कोशी प्रदेश प्रहरी अस्पतालका प्रमुखको रुपमा कार्यरत छन् ।
मन्त्रालयमा शुक्रबार आयोजित पदबहाली तथा स्वागत कार्यक्रममा बोल्दै मन्त्री मेहताले स्वास्थ्य क्षेत्रमा कार्यरत जनशक्तिलाई हौसला प्रदान गर्नुपर्नेमा जोड दिइन् । मन्त्री मेहताले जनता र स्वास्थ्य क्षेत्रमा कार्यरत जनशक्तिलाई सन्तुष्ट बनाउने कार्यलाई सरकारले प्राथमिकता दिने बताइन् ।
