विराटचोकः एनआईएमबि एस क्यापिटल लिमिटेडले आजदेखि नयाँ सामुहिक लगानी कोषका लागि एनआईबिएल स्टेबल फण्ड नामक एकाइ प्रतिइकाई १० रुपैयाँ अंकित मूल्यमा बिक्री गर्ने भएको छ ।
१ अर्ब रुपैयाँ बराबरको १० करोड इकाई बिक्रीमा ल्याउन लागिएको र सोमध्ये १० लाख इकाई योजना व्यवस्थापक एनआईएमबि एस क्यापिटललाई छुट्याइएको तथा १४ प्रतिशत अर्थात १ करोड ४० लाख इकाई कोष प्रवद्र्धक नेपाल इन्भेष्टमेन्ट मेगा बैंकलाई सुरक्षित गरिएको जनाइएको छ । बाँकी ८ करोड ५० लाख इकाई सर्वसाधारणले किन्न पाउने भएका हुन् ।
लगानीकर्ताले न्यूनतम १०० देखि अधिकतममा १ करोड इकाईसम्म माघ ५ गतेभित्र आवेदन दिन पाउने व्यवस्था गरिएको छ । सो समयसम्ममा पर्याप्त आवेदन नपरेमा माघ १६ गतेसम्म आवेदन दिने म्याद थप गर्न सकिने बताइएको छ । निवेदन दिने अवधि तथा बोर्डबाट थप भएको अवधिभित्र कम्तीमा ५० प्रतिशत अर्थात ५ करोड इकाई खरिदका लागि आवेदन आएमा पनि इकाईको बाँडफाँड गरिने र न्यूनतम संख्यामा इकाई बिक्री नभएमा योजना खारेज गरी १५ दिन भित्र निवेदकहरुको रकम फिर्ता गरिने बताइएको छ ।
बन्दमुखी प्रकृतिको सो फण्डको धितोपत्र निष्काशन तथा बिक्री प्रबन्धक एनआईएमबि एस क्यापिटल लिमिटेड रहेको छ । १२ वर्ष अवधिको उक्त फण्डको इकाईमा लगानीकर्ताले धितोपत्र बोर्डबाट आस्बा अनुमति लिएका सम्पूर्ण बैंक तथा वित्तीय संस्था तथा मेरो शेयर वेब तथा एपबाट पनि आवेदन दिन सक्नेछन् ।
