विराटचोकः फागुन २१ गते भएको प्रतिनिधि सभा निर्वाचनबाट राष्ट्रिय स्वतन्त्र पार्टीबाट केही सेलिब्रेटीहरू पनि संघीय संसदमा पुगेका छन् ।
रिमा विश्वकर्मा र अनुष्का श्रेष्ठले संसदको यात्रा तय गरेका हुन् । रिमा विश्वकर्माले पत्रकारिता तथा मिडिया क्षेत्रबाट आफ्नो करियर सुरु गरेकी थिइन् । रास्वपाले उनलाई दलित महिला समूहबाट समानुपातिक प्रणालीअन्तर्गत मनोनयन गरेको हो । उनी अभिनेत्री, मोडल र टेलिभिजन प्रस्तोता पनि हुन् । राजनीतिमा आउनुअघि उनले ‘नेपाल आइडल’ गायन रियालिटी शो सञ्चालन गरेकी थिइन् ।
अनुष्का श्रेष्ठ सन् २०१९ की मिस नेपाल विजेता हुन् । उनलाई रास्वपाले आदिवासी जनजाति महिला समूहबाट समानुपातिक प्रणालीमार्फत् मनोनयन गरेको हो । मिस वर्ल्ड प्रतियोगितामा उनले ‘ब्युटी विथ अ पर्पोज’ र ‘मल्टिमिडिया’ अवार्ड जितेकी थिइन् । पछि उनी सफल उद्यमीका रूपमा स्थापित भएर स्थानीय उत्पादन प्रवर्द्धनका लागि दक्षिण एशियाका शीर्ष १० महिला उद्यमीको सूचीमा समेत परेकी थिइन् ।
उनले सन् २०२० मा स्थापना गरेको ‘माकुसी’ चकलेट ब्रान्ड सफल व्यावसायिक उत्पादन हो ।
