विराटनगरः पैदल हिँडिरहेका दुई जना भारतीयबाट प्रहरीले ११ किलो गाँजा बरामद गरेको छ ।
आज दिउँसो १ बजे जिल्ला प्रहरी कार्यालय मोरङबाट खटिएको टोलीले विराटनगर महानगरपालिका–३ बाट भारतको अररिया जिल्ला घर भएका १८ वर्षीय पृथ्वीकुमार सिंह र २२ वर्षीय कृष्णकुमार सिंहलाई पक्राउ गरेको हो ।
पक्राउ परेकाविरुद्ध लागूऔषध ऐनअन्तर्गत मुद्दा चलाउने तयारी गरिएको प्रहरीले जनाएको छ ।
सई सुवास अधिकारी नेतृत्वको प्रहरी टोलीले शंकास्पद रूपमा पैदल हिँडिरहेका उनीहरूलाई नियन्त्रणमा लिएर साथमा रहेको निलो झोला खानतलासी गर्दा झोलाभित्र लुकाएर राखिएको ११ किलो गाँजा बरामद भएको थियो ।
मोरङ प्रहरीका सूचना अधिकारी डीएसपी लीलाराज लामिछानेका अनुसार बरामद गाँजासहित दुवै जनालाई नियन्त्रणमा लिएर अनुसन्धान शुरु गरिएको छ । उनीहरूले गाँजा कहाँबाट ल्याएका हुन् र कता लैजान लागेका थिए भन्ने विषयमा खुल्न बाँकी रहेको प्रहरीले जनाएको छ ।
