पथरीः आगामी प्रतिनिधिसभा निर्वाचनलाई लक्षित गर्दै खड्ग फागोले चुनावी अभियानलाई तीव्र बनाएका छन् । नेपाली कांग्रेस का तर्फबाट मोरङ क्षेत्र नम्बर–१ का प्रतिनिधिसभा सदस्य पदका उम्मेदवार रहेका फागो पछिल्लो समय गाउँगाउँ पुगेर मतदातासँग प्रत्यक्ष भेटघाटमा सक्रिय देखिएका छन् ।
चुनावी प्रचारलाई औपचारिक कार्यक्रममै सीमित नराखी मतदाताको घर आँगनसम्म पुग्ने रणनीति अपनाएका फागोले जनताको दैनिक जीवनसँग जोडिएका समस्या प्रत्यक्ष रूपमा सुन्ने अभियान सञ्चालन गरिरहेका छन् । घरदैलो कार्यक्रममार्फत् उनले स्थानीय नागरिकसँग संवाद गर्दै उनीहरूको अपेक्षा, गुनासा र विकाससम्बन्धी सुझाव संकलन गरिरहेका छन् ।
घरदैलो अभियानकै क्रममा स्थानीय बासिन्दाले शिक्षा, स्वास्थ्य, सडक पूर्वाधार, स्वच्छ खानेपानी, रोजगारी सिर्जना तथा कृषि विकासलाई मुख्य प्राथमिकताका रूपमा उठाएका छन् । ग्रामीण क्षेत्रमा गुणस्तरीय शिक्षा र स्वास्थ्य सेवाको पहुँच अझै कमजोर रहेको, सडक पूर्वाधार अपुग हुँदा दैनिक जीवनमा कठिनाइ भइरहेको तथा युवाहरू रोजगारीका लागि विदेशिन बाध्य भइरहेको विषय नागरिकहरूले खुलस्त रूपमा राखेका थिए ।
मतदाताका कुरा ध्यानपूर्वक सुन्दै उम्मेद्वार फागोले जनताको आवश्यकता र प्राथमिकतालाई केन्द्रमा राखेर योजनाबद्ध विकास कार्यक्रम अघि बढाउने प्रतिबद्धता व्यक्त गरेका छन् । उनले विकासलाई नारामा सीमित नराखी व्यावहारिक रूपमा कार्यान्वयन गर्ने आफ्नो लक्ष्य रहेको बताएका छन् ।
उनका अनुसार क्षेत्रको समग्र विकासका लागि नीतिगत पहल, उपलब्ध स्रोतको पारदर्शी र उचित व्यवस्थापन तथा योजनाहरूको प्रभावकारी कार्यान्वयन आवश्यक छ । घरदैलो कार्यक्रमका क्रममा स्थानीयवासीहरूले फागोलाई युवा, ऊर्जाशील र विकासप्रेमी नेताका रूपमा चित्रण गरेका छन् ।
लामो समयदेखि समाधान हुन नसकेका स्थानीय समस्या समाधान गर्न नयाँ सोच र सक्रिय नेतृत्व आवश्यक रहेको उनीहरूको धारणा थियो । क्षेत्रका समस्या नजिकबाट बुझेको नेतृत्व आए सकारात्मक परिवर्तन सम्भव हुने विश्वास स्थानीयले व्यक्त गरेका छन् ।
स्थानीय कृषकहरूले कृषि उत्पादनको बजारीकरण, सिंचाइ सुविधा विस्तार तथा आधुनिक कृषि प्रविधिको आवश्यकता औँल्याएका थिए । त्यस्तै, महिला समूहहरूले स्वरोजगार कार्यक्रम, सीपमूलक तालिम तथा स्वास्थ्य सेवाको सहज पहुँच विस्तार गर्न माग गरेका छन् । युवाहरूले खेलकुद पूर्वाधार, रोजगार अवसर तथा प्राविधिक शिक्षामा लगानी बढाउनुपर्ने सुझाव दिएका छन् ।
फागोले कृषि, पर्यटन, साना उद्योग र उद्यमशीलतालाई जोडेर स्थानीय अर्थतन्त्र बलियो बनाउने योजना अघि सार्दै रोजगारी सिर्जनालाई प्राथमिकतामा राख्ने बताएका छन् ।
