परासीः फागुन २१ गते हुने निर्वाचनका लागि नेपाली कांग्रेसका केन्द्रीय सदस्य एवं नवलपरासी (बर्दघाट सुस्ता पश्चिम) क्षेत्र नं. १ का प्रतिनिधि सभा सदस्य उम्मेदवार विनोद चौधरीले आफ्नो निर्वाचन लक्षित ‘प्रतिज्ञा–पत्र’ सार्वजनिक गरेका छन् ।
चौधरीले आफ्नो क्षेत्रको विकास र राष्ट्रिय समृद्धिको स्पष्ट खाका प्रस्तुत गरेका हुन् । जसमा उनले नवलपरासीलाई ‘आर्थिक केन्द्र’ बनाउने सोच प्रस्तुत गरेका छन् । अर्बपति व्यवसायीसमेत रहेका चौधरीले आफ्नो क्षेत्रमा उद्यमशीलता र स्वरोजगारलाई मुख्य प्राथमिकता दिएका छन् । उनले क्षेत्रभित्र औद्योगिक ग्रामहरू स्थापना गरी स्थानीय कच्चा पदार्थमा आधारित उद्योगहरू सञ्चालन गर्ने, युवाहरूलाई बिना धितो ‘स्टार्ट–अप’ कर्जा उपलब्ध गराउने र विदेशबाट फर्किएकाहरूको सीपलाई स्वदेशमै उपयोग गर्ने वातावरण बनाउने वाचा गरेका छन् ।
नवलपरासीको मुख्य समस्याका रूपमा रहेको भूमिहीन र सुकुम्बासी समस्यालाई उनले उच्च प्राथमिकतामा राखेका छन् । उनले भूमिहीन सुकुम्वासी र दलितहरूलाई दीर्घकालीन रूपमा व्यवस्थित गर्न आवश्यक कानुन निर्माण गरी लालपुर्जा उपलब्ध गराउने प्रतिज्ञा गरेका छन् ।
‘एक विद्यालय, एक ल्यापटप’ र ‘डिजिटल कक्षा’को अवधारणा ल्याएका उनले सो निर्वाचन क्षेत्रका सामुदायिक विद्यालयलाई नमुना विद्यालयका रूपमा विकास गर्ने र बर्दघाटमा ‘स्पोट्र्स एकेडेमी’ स्थापना गर्ने योजना ल्याएका छन् ।
