विराटचोकः मोरङको सुन्दरहरैँचा नगरपालिका–९ चित्रे टोलका ३६ वर्षीय राजनकुमार अधिकारीमाथि शनिबार राति धारिलो हतियार प्रहार भएको छ ।
घरमै सुतिरहेका बेला राति साढे १० बजेतिर हतियार प्रहार भएको प्रहरीले जनाएको छ । अपरिचित व्यक्तिले घरमा आएर रातको समयमा अधिकारीमाथि धारिलो हतियारले आक्रमण गर्ने व्यक्तिको पूर्ण पहिचान हुन बाँकी रहेको मोरङ प्रहरीका सूचना अधिकारी डीएसपी हरिनन्दन चौधरीले जानकारी दिनुभएको छ ।
मुख, हात, टाउको, बायाँ कानलगायत शरीरका विभिन्न भागमा चोट लागेका अधिकारीको अवस्था गम्भीर रहेको प्रहरीले जनाएको छ । घटनालगत्तै अधिकारीलाई उद्धार गरेर उपचारका लागि विराटचोकको सुकुना सामुदायिक अस्पताल लगिएको थियो । त्यहाँ उपचार सम्भव नभएपछि थप उपचारका लागि विराटनगरस्थित नोबेल शिक्षण अस्पतालमा भर्ना गरिएको छ ।
२ वर्षअघि वैदेशिक रोजगारीका लागि मलेसिया गएका अधिकारी फागुन ५ गते नेपाल फर्किएका थिए । घटनामा उनकै श्रीमतीको संलग्नता हुन सक्ने प्रहरीको प्रारम्भिक अनुमान छ । अधिकारीकी पत्नी रन्जना कार्की (अधिकारी) लाई नियन्त्रणमा लिएर घटनाको थप अनुसन्धान अघि बढाइएको र रन्जनाले सोधपुछका क्रममा आफैंले श्रीमानलाई खुर्पाले प्रहार गरेको बताएको प्रहरीले जनाएको छ ।
घटनामा अरु व्यक्तिको पनि संलग्नताको आशंकामा प्रहरीले अनुसन्धान अघि बढाएको र घटनामा संलग्न सम्भावित अन्य व्यक्तिको खोजी एवं पहिचानका लागि इलाका प्रहरी कार्यालय बेलबारीका इन्स्पेक्टर राजीव गिरीको नेतृत्वमा टोली खटिएको जनाइएको छ । नियन्त्रणमा लिइएकी रञ्जनालाई इलाका प्रहरी कार्यालय बेलबारीमा राखिएको प्रहरीले जनाएको छ ।
