काठमाडौंः धादिङमा भएको बस दुर्घटनामा परेर १७ जनाको मृत्यु भएको छ । २४ घाइते भएका छन् ।
प्रहरीका अनुसार राति करिब साढे १ बजे धादिङको बेनिघाट रोराङ्ग गाउँ पालिका–५ भैंसिगौडास्थित पृथ्वी लोकमार्गमा पोखराबाट काठमाडौंतर्फ आँउदै गरेको ग १ ख १४२१ नम्बर यात्रुबाहक बस त्रिशुली नदीको किनारमा खसेर दुर्घटना भएको थियो ।
घटनास्थलमा उद्धारका लागि सशस्त्र प्रहरी बल नेपालको विपद् व्यवस्थापन तालिम शिक्षालय कुरिनटारबाट गोताखोर सहितको टोली खटिएको छ । टोलीले १७ जनाको शव फेला पारेको थियो ।
सो घटनामा घाइते भएका २४ जनालाई उद्धार गरिएको सशस्त्र प्रहरीका सहप्रवक्ता डीएसपी शैलेन्द्र थापाले बताउनुभयो । घाइते तथा मृतकको सनाखत हुन बाँकी छ । दुर्घटनाको कारण खुलेको छैन । प्रहरीले घटनाको सम्बन्धमा अनुसन्धान शुरु गरेको जनाएको छ ।
घटनास्थलबाट डुङ्गामा घाइतेलाई ओसारेर बगरमा निकालेर एम्बुलेन्समार्फत् अस्पताल पठाउने काम भइरहेको प्रहरीले जनाएको छ ।
बस सडकबाट करीब ३०० मिटर तल त्रिशुलीको किनारमा खसेको बताइएको छ ।
