सुन्दरहरैंचाः नेकपा माओवादी केन्द्रले गरेका राम्रा कामहरुको प्रचार हुन नसकेकाले अपेक्षा गरेअनुसारको जनमत पार्टीले बनाउन नसकेको नेकपा माओवादी केन्द्रका नेताहरुले बताएका छन् ।
सुन्दरहरैंचाको वडा नम्बर ७ को दोस्रो अधिवेशन उद्घाटन सत्रमा बोल्ने अधिकांश अतिथिहरुले माओवादीले गरेका राम्रा कामको प्रचार हुन नसक्दा पार्टी पछि परेको बताए । कार्यक्रमकी प्रमुख अतिथि प्रदेश कमिटी सहइन्चार्ज रचना राईले नेकपा माओवादी केन्द्रले गरेका राम्रा कामको प्रचार कार्यकर्ताले गर्न नसक्नु दुःखद भएको बताइन् ।
सुन्दरहरैंचा नगरपालिकाका इन्चार्ज नवराज चापागाईँले राजनीतिक परिवर्तन भए पनि हाम्रो संस्कार र संस्कृति परिवर्तन नहुँदा सोचेजस्तो प्रगति हुन नसकेको बताए ।
सह इन्चार्ज गीताप्रसाद श्रेष्ठले देशको प्रमुख दुस्मनको रुपमा रहेको भ्रष्टाचारको अन्त्य नगरेसम्म देशमा आर्थिक समृद्धि हुन नसक्ने उनको भनाइ थियो । भ्रष्टाचारको अन्त्य नभएसम्म विकास तीव्र गतिमा हुन नसक्ने उनले औँल्याए ।
प्रदेश कमिटी सदस्य सीता कडरियाले पार्टीका विभिन्न जनवर्गीय सङ्गठनहरु कमजोर भएको बताइन् । ‘हाम्रा कमिटीहरु किन संस्थागत छैनन्,’, उनले भनिन्, ‘चुनावमा बनेका कमिटी किन आजसम्म सक्रिय छैनन् ? चुनावमा बनेका कमिटीहरुलाई आज परिचालन गर्न खोज्दा किन पदाधिकारी खोजेर हिँड्नुपर्छ ? पार्टीको सदस्यता काटेका व्यक्तिलाई सदस्यता नवीकरण गर्नुपर्छ भनेर किन हात जोड्नुपर्छ ?’
नेकपा माओवादी केन्द्र सुन्दरहरैंचा ७ को अध्यक्षमा पुनः मिलन लुइँटेल
