इटहरीः नयन मिडिया फाउन्डेसनका अध्यक्ष पवन अधिकारी तथा कान्तिपुर टेलिभिजनका व्यापार प्रमुख सागर केसी र मार्केटिङ मेनेजर अनुपम अधिकारीबीच कोशी एक्सिलेन्स अवार्ड वितरण कार्यक्रमको प्रत्यक्ष प्रशारण गर्ने सम्झौता भएको छ ।
फागुन ७ गते इटहरीको सोल्टी वेस्ट्रन होटलमा कोशी प्रदेशको पर्यटन, व्यापार र सामाजिक सांस्कृतिक पहिचान प्रवर्धनका लागि योगदान गर्ने उद्देश्यले कोशी एक्सिलेन्स अवार्ड – २०२६ आयोजना हुँदै छ । प्रदेशकै सबैभन्दा ठूलो र प्रतिष्ठित अवार्डका रुपमा सो अवार्डलाई दाबी गरिएको छ ।
कोशी प्रदेशमा जन्मिएर राष्ट्रिय तथा अन्तर्राष्ट्रिय क्षेत्रमा उल्लेखनीय योगदान पुर्याउने व्यक्तिलाई सम्मान गर्दै आइएको सो अवार्डलाई अझ परिष्कृत र प्रभावशाली बनाउन तीन नयाँ विधा अटोमोबाइल, सङ्गीत र क्यापिटल मार्केट थप गरेर १६ विधामा अवार्ड प्रदान गरिने आयोजक संस्था नयन मिडिया फाउन्डेसनका अध्यक्ष पवन अधिकारीले बताउनुभयो ।
गत वर्ष शिक्षा, स्वास्थ्य, सञ्चार, साहित्य, पर्यटन, कृषि, कर्पोरेट, बैंकिङ, खेलकुद, सामाजिक, स्टार्टअप, टेक्नोलोजी र बीमालगायत दर्जनभन्दा बढी विधामा अवार्ड प्रदान गरिएको उहाँले बताउनुभयो ।
अवार्डलाई थप विश्वासिलो र राष्ट्रिय स्तरको बनाउने उद्देश्यले उच्चस्तरीय निर्णायक समिति गठन गरिएको अध्यक्ष अधिकारीले बताउनुभयो । निर्णायक समितिमा नेपाल राष्ट्र बैंकका पूर्व गभर्नर महाप्रसाद अधिकारी प्रमुख सल्लाहकार हुनुहुन्छ । संविधानसभा सदस्य पवन शारडाको संयोजकत्वमा चार सदस्यीय निर्णायक मण्डल गठन गरिएको छ ।
कोशी प्रदेश सरकारले कोशी पर्यटन वर्ष–२०८२’ को तयारीलाई अघि बढाइरहेको सन्दर्भमा, अवार्ड कार्यक्रमले प्रदेशको पर्यटन, व्यापार र सामाजिक सांस्कृतिक पहिचान प्रवद्र्धनमा महत्त्वपूर्ण भूमिका खेल्ने आयोजकले विश्वास लिएको जनाएको छ ।
कार्यक्रमले व्यापारसँगै पर्यटन प्रवद्र्धनमा टेवा पुर्याउने र कोशी पर्यटनलाई राष्ट्रिय स्तरमै चिनाउने लक्ष्य रहेको बताइएको छ । अवार्ड कार्यक्रमको व्यवस्थापन इटहरीस्थित काफल्सले गर्ने भएको छ ।
