गछियाः साजीलाल माध्यमिक विद्यालयले आयोजना गरेको सुन्दरहरैंचा नगरपालिकाका सामुदायिक माविस्तरीय हाजिरीजवाफमा आयोजक साजीलाल नै पहिलो भएको छ ।
विद्यालयमा अक्षयकोष स्थापना गरेका दाता परिवारको सहयोगमा भएको षडानन्द, टीकाराम दाहाल अन्तर मावि हाजिरीजवाफमा साजीलाल पहिलो भएको हो । ११ विद्यालय सहभागी प्रतियोगितामा सुकुना मावि दोस्रो, जनता मावि बुधबारे तेस्रो र पञ्चायत मावि गोठगाउँ चौथो भएका छन् ।
विजयी विद्यार्थीलाई नगद पुरस्कार र प्रमाणपत्र वितरण गरिएको थियो । पहिलो हुने टिमले नगद ९ हजार, दोस्रो हुनेले ६ हजार र तेस्रो हुनेले ३ हजार रुपैयाँ पुरस्कार पाएका थिए । कार्यक्रमका प्रमुख अतिथि जिल्ला समन्वय समिति मोरङका प्रमुख अजम्बर राई, विद्यालयका प्रधानाध्यापक श्यामबाबु काफ्ले तथा दाता परिवारका तर्फबाट स्व. टीकारामकी धर्मपत्नी कमला पोखरेल, टीकाराम र षडानन्दका मातापिता पीताम्बर दाहाल र रुद्रकुमारी दाहाल तथा भाइ मातृका दाहालले पुरस्कार वितरण गर्नुभएको थियो ।
अक्षयकोष संस्थापक पीताम्बर दाहालले पहिलो प्रश्न सोधेर शुरु गर्नुभएको हाजिरीजवाफ प्रतियोगितामा प्रश्नकर्ताको रुपमा सुन्दरहरैंचा–१० निवासी सञ्जय शर्मा रहनुभएको थियो ।
साजीलाला माध्यमिक विद्यालयले आफ्नो ६० औँ वार्षिकोत्सवअन्तर्गत सो प्रतियोगिता आयोजना गरेको थियो । वार्षिकोत्सव अन्तर्गत नै आज छात्रवृत्ति तथा पुरस्कार वितरण तथा भोलि वार्षिकोत्सव तथा अभिभावक दिवसका कार्यक्रम हुने विद्यालयले जनाएको छ ।
