गोरखाः प्रमुख पर्यटकीय गन्तव्यका रूपमा रहेको उत्तरी गोरखाको मनास्लु संरक्षण क्षेत्रमा सन् २०२३ मा अहिलेसम्मकै सर्वाधिक पर्यटक घुम्न पुगेका छन् ।
१ वर्षको अवधिमा ९ हजार १ सय ६६ जना विदेशी पर्यटकले यस क्षेत्रको भ्रमण गरेको मनास्लु संरक्षण क्षेत्र आयोजना कार्यालय (एमक्याप) का प्रमुख सन्तोष शेरचनले जानकारी दिएका छन् ।
सन् २०२२ मा सो क्षेत्रमा ६ हजार १ सय २ जना विदेशी पर्यटकले भ्रमण गरेका थिए । सन् २०१९ मा ७ हजार ५५५ जनाले, सन् २०१८ मा ७ हजार ६५४ जनाले भ्रमण गरेका थिए । कोरोना संक्रमणका कारण सन् २०२० मा ३ सय ३७ र सन् २०२१ मा ९ सय २५ जनाले मात्र मनास्लु क्षेत्रको भ्रमण गरेका थिए ।
