विराटचोकः शनिबारदेखि मोरङको सुन्दरहरैँचा नगरपालिकामा सातौँ राष्ट्रपति रनिङ शिल्ड प्रतियोगिता शुरु भएको छ । सुकुना माध्यमिक विद्यालयको खेलमैदानमा सञ्चालन भइरहेको प्रतियोगिताको उद्घाटन जिल्ला समन्वय समिति मोरङका प्रमुख अजम्बर राईले र कार्यक्रमको अध्यक्षता सुन्दरहरैँचा नगरपालिकाका नगर प्रमुख केदारप्रसाद गुरागाईँले गर्नुभएको थियो ।
प्रतियोगिताअन्तर्गत पहिलो दिन सुकुना माध्यमिक विद्यालयले ५ स्वर्ण, ८ रजत र ३ कास्य पदक जितेर पहिलो स्थानमा रहेको छ । साजीलाल माध्यमिक विद्यालयले ५ स्वर्ण, ६ रजत र ३ कास्य, पूर्वाञ्चल एकेडेमीले ४ स्वर्ण, १ रजत र १ कास्य, सिद्धार्थ सेकेन्डरी स्कुलले १ स्वर्ण र १ कास्य पदक पाएका छन् ।
त्यस्तै, जनता माध्यमिक विद्यालय बुधबारे र शिक्षा निकेतन मावि सलकपुरले समान १–१ स्वर्ण पदक जित्दा टेन्डरफिट बोर्डिङ स्कुलले १ कास्य पदक जितेको छ ।
सुकुना माध्यमिक विद्यालय, सुन्दरहरैँचा १० को आयोजना तथा महेन्द्र माध्यमिक विद्यालय, सुन्दरहरैँचा ११ को सह–आयोजनामा भइरहेको प्रतियोगितामा नगरभित्रका विभिन्न विद्यालयका विद्यार्थीको उत्साहजनक सहभागिता रहेको छ ।
